Read Sukuma Bible 2015 – Bibilia Ilagano Lya Kale 2015 Zabuli 130 Bible Online

Zabuli 130 - Sukuma Bible 2015 – Bibilia Ilagano Lya Kale 2015 bible

Zabuli 130

¹Lyīmbo ng'wikanza lya kūlamya. Ee SEEBA, nalī mu būjiba būshimu nalīkūlīlīīla.

²Ee Seeba, liigwage ī lilaka lyane! A matū gako ni galīdegelekage ī lilaka lya kwikūmbīlīja kwane.

³Ee SEEBA, ī shibi shise ūlū ni ūkashitūūlaga hanhū kūlwa kūshizūkwa, ni wilongela halī ū ng'wela wa kwīmīīla?

⁴Alīyo ū bebe ūlī nchīji wa shigongo, na lūūlū a banhū bakogohile.

⁵Ū nene nanindīīlile SEEBA, ū būpanga wane būlindanile; nīyo ū kwisagīlwa kwane kūlī ha mhayo gwakwe.

⁶Ū būpanga wane būnindīīlile SEEBA, kūtinda ūmo balang'hani bakabūlindīīlīlaga būjikū gīkī wangalūke.

⁷Ee Isilaeli, ntūūlīlage SEEBA ū kwisagīlwa kwako, nguno ū kūlī SEEBA būlīho būtogwa būtī wa kūshila, hama ū kūlī we būlīho būkomooji būtaale.

⁸Nīyo hū wei akūnkomoola ū Isilaeli kūfuma mu būkenaagūji wakwe bose.