Read Sukuma Bible 2015 – Bibilia Ilagano Lya Kale 2015 Zabuli 132 Bible Online

Zabuli 132 - Sukuma Bible 2015 – Bibilia Ilagano Lya Kale 2015 bible

Zabuli 132

¹Lyīmbo ng'wikanza lya kūlamya. Ee SEEBA, ng'wizūkagwe ū Daūdi, na a makoye pye a gose ayo wagabītīla.

²Ū wei akang'wilahīlīla ū SEEBA, witonga ū kūlī wa Būdūla, ū Mulungu o ng'wa Yakobo; ūhaya gīkī,

³“Natingīla ū mu numba yane, nūūlū ha būlīīlī wane natūlinha;

⁴na a miso gane natūgazunīlīja gahweeje, nūūlū a makumbīīso gane yaya ū kūlaala,

⁵kūshisha ū SEEBA nampandīkīle ipandī; ū wa Būdūla, ū Mulungu o ng'wa Yakobo abize na wikalo.”

⁶Tūkīyiigwa tūlī Efulata, twahayūshika mu matogolo ga Yaali twībona,

⁷“Tūjagi koi ū kū wikalo wakwe, tūkalamye kū būtūūlo wa mhambala jakwe.”

⁸Ee SEEBA, būkaga ū bebe hamò nī lisandīko lya nguzu jako, ūje kwipandī lyako lya kwifuulīla.

⁹A bagabīji bako bazwalile būtūngīlīja, a beela bako bīmbe na būyegi.

¹⁰Kūlwa nguno ya ntūmami wako Daūdi, ūtīzūmponya ū ng'witīīlwa magūta wako.

¹¹Ū SEEBA akanahīlīla ū Daūdi shilahīlo sha ng'hana, īsho atīko kūgalūka ashileke; akang'wīla, “Ūmò wa mu būbyīle wako nakūntūūla a h'isumbī lyako lya būtemi.

¹²A bitūnja bako ūlū būlīlang'hana Ī lilagane lyane, nū mhayo gwane ūyo nakūbalanga būgūdima, na a baana babo bakwigasha a h'isumbī lyako lya būtemi, kūshisha welelo bose.”

¹³Ū SEEBA wagūsola ū nzengo gwa Sayuni, wagwikūmvwa būbize wikalo wakwe.

¹⁴“Ī lyenīlī līl'ipandī lya wifuulīlo wane wa būja na būja; ī lyenīlī h'ī lipandī lyane lya kwikala, nguno līniyegije.

¹⁵Ī lipandī lyenīlī nakūlīfuuha shikwīle moi ī sha kwigunanhīla, a bahabī baamo nakūbinha shilīwa sha kūbigela.

¹⁶A bagabīji baamo nakūbazwīka būpīji, a beela bakūyikala bakwīmbaga na būyegi shikū jose.

¹⁷A henaha ū Daūdi nakūngūngūmūlīla ipembe,[29] nakūmeegeja tala ū ng'witīīlwa maguta wane.

¹⁸A banishi bakwe nakūbazwīka magooke, alīyo ū wei ī ngikili ya kū ntwe gwakwe īkūbiza y'ikūjo no.”