Read Sukuma Bible 2015 – Bibilia Ilagano Lya Kale 2015 Zabuli 135 Bible Online

Zabuli 135 - Sukuma Bible 2015 – Bibilia Ilagano Lya Kale 2015 bible

Zabuli 135

¹Nkumīlījagi SEEBA. Līkumīlījagi ī lina lya ng'wa SEEBA, bing'we a batūmami ba ng'wa SEEBA, nkumīlījagi we;

²bing'we abo mukatūmamaga mu numba ya ng'wa SEEBA, mu mabīndo ga numba ya ng'wa Mulungu wise.

³Nkumīlījagi SEEBA, nguno ū SEEBA alī wawiza; Īmbagi mulīgongoole ī lina lyakwe, nguno ū mhayo gwenūyo gūlī gwawiza.

⁴Ū SEEBA akansola ū Yakobo abize wakwe, ū Isilaeli alī sabo yakwe we ng'wenekīlī.

⁵Namanile gīkī ū SEEBA alī ntaale, ū SEEBA wise alī higūlya ya bamulungu bose.

⁶Ū SEEBA akīītaga gose gose ūyo gūnyeja, ū ng'wigūlū nū mu sī, pyī nū mu manyanza; nūūlū mu būjiba būshimu no.

⁷Hū ng'wene akagītaga a malunde gaabūūka ūko gakafumaga;[30] nī mbula akīyītīlaga wei ī ndabi; nū nyaga akagwenhaga wei kūfuma mu mabīkīlo gakwe.

⁸Na a babyalwa ba kwandya ū mu Misili hū ng'wene akabatūla, a babyalwa ba kwandya ba banhū, nī mitugo[31] ī mbyalwa ja kwandya.

⁹Ūtūma shimanīkījo na shakūkumya, ū mulī bebe Ee Misili; kūlwa nguno ya ng'wa Falao, na batūmami bakwe bose pye.

¹⁰Mahanga mingī akagatūla, ūbūlaga batemi ba nguzu,

¹¹Sihoni, ntemi wa Baamoli; na Ogu, ntemi wa Bashani, na a batemi a bose a ba mu Kanaani.

¹²Ī sī yabo wīfunya kūbiza wingīji, wingīji kū Baisilaeli a banhū bakwe.

¹³Ī lina lyako, Ee SEEBA, līlī lya kūshinga welelo bose; Ee SEEBA, ū lūkumo lwako lūkūbiza ho kūshisha shibyalīlwe shose.

¹⁴Nguno ū SEEBA akūbalwīlīla a banhū bakwe, na akūbachīla shigongo a batūmami bakwe.

¹⁵Ī shiikolile īsho shikalamiagwa mu mahanga, shilī sha feza na zahabu; shikabeejiagwa na makono ga banhū.

¹⁶Ī milomo shilī nayo, alīyo shitalūngalūngaga, na a miso shilī nago, alīyo shitabonaga.

¹⁷Shilī na matū, alīyo shitigwaga, hama shitī na myūyī ū mu milomo yasho.

¹⁸Abo bakashibeejaga bashiikolile, pye na a babo bashisanije.

¹⁹Bing'we ba numba ya ng'wa Isilaeli, nkumīlījagi SEEBA; bing'we ba numba ya ng'wa Alooni, nkumīlījagi SEEBA.

²⁰Bing'we ba numba ya ng'wa Lawī, nkumīlījagi SEEBA, bing'we abo mung'ogohile ū wei, nkumīlījagi SEEBA.

²¹Ū SEEBA akumīlījiwe kūfuma Sayuni, ū wei ūyo akikalaga mu Yelusalemu. Nkumīlījagi SEEBA.