Read Sukuma Bible 2015 – Bibilia Ilagano Lya Kale 2015 Zabuli 140 Bible Online

Zabuli 140 - Sukuma Bible 2015 – Bibilia Ilagano Lya Kale 2015 bible

Zabuli 140

¹Kūlwa ntongeeji wa bīmbi. Zabuli ya ng'wa Daūdi. Ee SEEBA, nipījage ū kū banhū babūbi; nilang'hanage ū kū biboneeji,

²abo bakikalaga būhela mihayo mibi mu ngoholò jabo, na kwandya wikenya būlī gwa.

³Ī ndīmi jabo bajinoolile jūgīha gītī ja nzoka, ī milomo yabo īkafunyaga būsūngū gītī bo ng'hoboko.

⁴Ee SEEBA, nibaladage natizūgwa mu makono ga banhū babūbi; nilang'hanage ū kū biboneeji, abo balī na ng'hūmbū ja kūnigwasha mhambala jane.

⁵A bibonya babisile mitego ya kūnigwasha; hose hose baasambaaja ngoye ja mitego yabo; nū mu nzīla ūmo nakabītīlaga īlīmo mitego yabo ya kūnipuja.

⁶Ū SEEBA nakūng'wīlaga gīkī, “Ū bebe ūlī Mulungu wane;” Ee SEEBA, līdegelekage ī lilaka lya kwikūmbīlīja kwane.

⁷Ee SEEBA Nsugi ntaale, bebe ūyo ūlī mpīja wane wa nguzu; ūyo ūkagūlang'hanaga ū ntwe gwane ng'wikanza lya būlūgū,

⁸a babūbi ūtizūbashikīlīgīja, Ee SEEBA, kūlenganīla na ng'hūmbū jabo; ūtizūbazunīlīja kwīshikīlīja īyo bīhelile, nguno numho bakwikumīlīja no.

⁹Abo banigobanīlile ī mitwe yabo leka Īkundīkījiwe makoye ayo genhelejiwe na milomo yabo.

¹⁰Ni bidīkīlagwe makala ga moto; leka baponyiwe mu moto, mu machongo mashimu, batizūfuma mo ilalī.

¹¹A balembekeja ūtizūbaleka bakapandīka nguzu ū mu sī, a biboneeji gabakūūbīlīje mayanga kūshisha gabakenaagūle.

¹²Namanile ū SEEBA akwīlang'hana ī ng'hana ya nuhiwa, nū ngayiwa akūng'wītīla kūlenganīla na būtūngīlīja wakwe.

¹³Na ng'hana a batūngīlīja bakūlīkumīlīja Ī lina lyako, nīyo a ba nhūngwa jigoloolile bakwikala hamò nang'ho.