Read Sukuma Bible 2015 – Bibilia Ilagano Lya Kale 2015 Zabuli 141 Bible Online

Zabuli 141 - Sukuma Bible 2015 – Bibilia Ilagano Lya Kale 2015 bible

Zabuli 141

¹Zabuli ya ng'wa Daūdi. Ee SEEBA, nalīkwitana nangūhīlage; liigwage ī lilaka lyane ūlū nalīkwitana.

²Ū kūlomba kwane kūkūpandīke gītī kūzuukīja kwa ngazu; nū kūkūbūūkīja makono gane kūbize gītī shitambò sha mhindī.

³Ee SEEBA, lagījaga a kalūngalūngīle kane kalang'hanwe, ūtūūle būlang'hani a ha nyango gwa nomo gwane.

⁴Ūtizīlekela ī ng'holò yane īdutwe na būbi, nikale nakwītaga mihayo ītigelile, hamò na banhū ba nhūngwa ja malofu; nī shizeeze shabo yaya ū nene ū kūshilya.

⁵Ū munhū ntūngīlīja ni anihūgūlage, Ī shenīsho shilī shigongo; ni anihamage, genayo maguta kū ntwe gone, ū ntwe gwane gūtūgalema. Alīyo ū kūlomba kwane kwipūūganije nī shītīle sha bahūnga būlī gwa;

⁶a basugi babo ni binhagwe nsango gwa kūtaalīkwa ha mawe, hūna bakwitegeleja gīkī ū mhayo gwane, ūyo nakūbawīlaga gūlī gwa ng'hana.

⁷Bakūhaya gīkī, “A maguha gise galīyūsambaajiwa higūlya ya shigila, gītī nīmi akūsemaga sī wīgūndagūla.”

⁸Alīyo a miso gane gakūlolile bebe, Ee Seeba MULUNGU; ū nene nakūsendamīlile bebe, ūtizūbūleka mu kūcha ū būpanga bone.

⁹Nilang'hanage natizūgwashiwa na mitego Īyo banitegile, ūnipīje ū mu mbeto ījo bakūjitegaga banhū babūbi.

¹⁰A ba malofu ni bagwīlage boi benekīlī ū mu mitego yabo, ū nene nabīte mhola nalangūlile nakūdanaga.