Read Sukuma Bible 2015 – Bibilia Ilagano Lya Kale 2015 Zabuli 142 Bible Online

Zabuli 142 - Sukuma Bible 2015 – Bibilia Ilagano Lya Kale 2015 bible

Zabuli 142

¹Lyīmbo lya kūlomba kwa ng'wa Daūdi; aho walī ng'wipilinga. Nakūnīlīīlaga ū SEEBA n'ilaka lyane, ū SEEBA nalīng'wikūmbīlīja n'ilaka lyane.

²Nalīng'wigwīlīja ū kūdaaya kwane, a makoye gane nalīnsomboolela we.

³Ū moyo gwane ūlū gūzwangana, ū bebe h'ūyo wīmanile ī nzīla yane; ū mu nzīla yane ūmo nakūshimīzīlaga babisile mo ntego gwa kūnigwasha.

⁴Lolaga ū kū nkono gwane gwa būlyo, ūkūbona gīkī atīho ū ndīlīīji; natī na ha kūpeelela, ndūhū gete ūyo abūdīlīlile ū būpanga wane.

⁵Ee Seeba, nalīkwitana nalīhaya gīkī, “Ū bebe hū ūl'ibūngīlo lyane, ūlī ngabo gwane ū mu sī ya bapanga.”

⁶Kūdegelekage ū kūlīla kwane, nguno nalī mu kwihīga kūtaale no; nigunage ū kū banhū abo bakūnikūūbījaga, banilebije ī nguzu.

⁷Nīnjage ū mu būtungwa wane, nadūle kūlīkumīlīja ī lina lyako. A batūngīlīja bakwiza kūbiza hamò nane kūlwa nguno ya wiza ūbo ūkūnīītīla.