Read Sukuma Bible 2015 – Bibilia Ilagano Lya Kale 2015 Zabuli 143 Bible Online

Zabuli 143 - Sukuma Bible 2015 – Bibilia Ilagano Lya Kale 2015 bible

Zabuli 143

¹Zabuli ya ng'wa Daūdi. Ee SEEBA, kwigwage ū kūlomba kwane, kūdegelekage ū kwikūmbīlīja kwane; nishokejage kūlenganīla na būsanyiwa wako, hamò na būtūngīlīja wako.

²Ū nene ntūmami wako ūtizūnitūūla ng'wibanza lyako kūnilamula, nguno ū mu banhū bapanga atīho ntūngīlīja nūūlū ūmò ū kū būtongi wako.

³Ū ng'wanishi wane akūnikūūbīlījaga, wabūtobagūlīlile hasī ū būpanga wane; waniponije mu giiti nikale ng'wenūmo, Ī haha natikīlile na banhū abo baacha kale.

⁴Hūna lūūlū ū mu gatī yane ū moyo gwane gwachile idedebaja, ū mu gatī yane ī ng'holò yane yalumīlile.

⁵Nakūjiizūkagwa ī shikū ī ja kale, Ī shītīle shako shose nakūshideedeng'hanyaga, kūnū nūyiganika ī milīmo ya makono gako.

⁶Nalīkwambīla bebe a makono gane, ū būpanga wane būtikīlaga na sī yakalamuchiwa chū, būlī na notà no kūlwa nguno yako.

⁷Ee SEEBA, ū moyo gwane gwamalile ī nguzu, nishokejage wangū; lekaga ū kūnibisa ū būshū wako, ūlū chene nakūbiza gīt'ūmo balī abo bakaholomokelaga ng'wichongo.

⁸Būlī dilū ninhage kūwiigwa ū būtogwa wako, nguno nakwisagīlilwe bebe; nilangage ī nzīla īyo īniigeleelilwe kwībītīla, nguno ū būpanga wane nakūtūūlīlile bebe.

⁹Ee SEEBA, nipījage ū mu makono ga banishi bane, nguno nalīpeelela kūlī bebe.

¹⁰Nilangage ū kwīta īyo wītogilwe bebe, nguno ū bebe h'ūlī Mulungu wane; ū Moyo wako wawiza anitongeele nashike mu sī ya nhūngwa jitūngīlīgije.

¹¹Ee SEEBA, kūlwa lina lyako būlang'hanage ū būpanga wane, nīnjage ū mu makoye kūlwa būtūngīlīja wako.

¹²Kūlwa būtogwa wako bakenaagūlage a banishi bane, bayagajage gete pye a baluhya bane; nguno ū nene nalī ntūmami wako.