Read Sukuma Bible 2015 – Bibilia Ilagano Lya Kale 2015 Zabuli 144 Bible Online

Zabuli 144 - Sukuma Bible 2015 – Bibilia Ilagano Lya Kale 2015 bible

Zabuli 144

¹Zabuli ya ng'wa Daūdi. Akumīlījiwe ū SEEA, ūyo alī shiganga shane, na akagalangaga a makono gane kalwīīle mu būlūgu; nī nzwala jane akajoolekejaga ī ya kwīta ū mu būlūgū.

²Ū we alī ntogwa wane no no no, hangī hū ng'wene ūyo alī Shiganga shane; Ipīlīlo lyane na Nkomooji wane, Lūmūda lwane ūyo mulī we nakapīlīlaga, hū ng'wene akatūūlaga banhū ha sīlīlī ya būsugi wakwe.

³Ee SEEBA, ū munhū nang'hwe alī shikolo kī, nose ūndīlīle? Ū ng'wana wa munhū alī kī, ūng'wizūkwe?

⁴Ū munhū atikīlile na myūyī dūhū, Ī shikū ja būlamu wakwe jilī ja kūbīta wangū gītī nengeeji.

⁵Ee SEEBA, līdeemhyage ī ligūlū lyako, wike; jikuumyage ī ngūlū jizuuke lyochi.

⁶Tūmaga ndabi jako ūbasambaaje a banishi bako, balasage na masonga gako ūbapyene.

⁷Gūgoloolage ū nkono gwako kūfuma kwigūlya, nikomoolage ūnipīje kūfuma mu minzī mingī, kūfuma mu nkono gwa banhū abo natabamanile,

⁸abo milomo yabo yokalile būlomolomo, nū nkono gwabo gwa būlyo gūtī na būng'hana.

⁹Ee Mulungu, nakūkwīmbīla lyīmbo ipya, nakūkwīmbīla kūnū nakūtūlaga ndono.

¹⁰Ū bebe ūyo ūkabinhaga būpyeni batemi, ūyo ūkampīja Daūdi ntūmami wako kūfuma mu nhabaala ya līlūshū.

¹¹Nikomoolage ūnipīje kūfuma mu nkono gwa banhū abo natabamanile, abo milomo yabo yokalile būlomolomo, nū nkono gwabo gwa būlyo gūtī na būng'hana.

¹²A bitūnja bise ū ng'wikanza lya walūki wabo babize gītī mitī īkūfulumaga chiza; a bashīke bise nabo babize gītī ng'hīngī jibeegelejiwe chiza, kūlwa būlenji mu numba y'ikūlū.

¹³A maluuli gise gokale pa, tūbize na shiigunanhīlo sha būlī mbika, ī ng'holo jise najo jiibyalane, jibize madaale mataale ga mashihumbī mingī ū kū madīīmīlo gise.

¹⁴Ī ng'ombe jise jikūle, jibize na nguzu, na tūtizūdumīlwa nūūlū kūtwalwa mu būding'wa; nū mu mizengo yise shitizilonga shose shose sha kwenheleja būpīna.

¹⁵Balī na a banhū abo bakwīlūkīlwa Ī yenīyī, balī na a banhū abo SEEBA alī Mulungu wabo.