Read Sukuma Bible 2015 – Bibilia Ilagano Lya Kale 2015 Zabuli 16 Bible Online

Zabuli 16 - Sukuma Bible 2015 – Bibilia Ilagano Lya Kale 2015 bible

Zabuli 16

¹Lyīmbo lya ng'wa Daūdi. Ee Mulungu, nibaladage, nguno ū būpīlīlo nakapandīkīlaga mulī bebe.

²Nakang'wīla ū SEEBA gīkī, “Ū bebe ūlī Seeba wane, ūlū ūtī bebe ū nene natī na wiza bose bose.”

³Hama a beela bako abo balīmo ū mu sī, bawiza no, nīyo h'abo nabayegelile ū nene.

⁴Abo bakalondeelaga bamulungu bangī, bakiyinhaga makoye mingī no; ū nene yaya ū kwiita ha ng'walīlo shitambò shabo sha mininga, nūūlū ī lina lyabo yaya ū kūlīhaya na nomo gwane.

⁵Ū SEEBA alī ngabo gwane na shikombe shane; bebe hū ūbūdimīīlile ū wingīji wane.

⁶Ī mbīmbī jane jagwīlile ha soga. Alichene, ninhilwe wingīji būsoga.

⁷Nalīnkumīlīja SEEBA, ūyo alī nganikīji wane; nī būjikū ī ng'holò yane īkanitongaga.

⁸Ū SEEBA nantongije kū būtongi wane gwa; nīyo īkī alī kū nkono gwane gwa būlyo, natīko kūtinginyiwa.

⁹Hūna lūūlū ī ng'holò yane īlī na būyegi, nū būpanga wane būlī mu būzalabanu, ū mīlī gwane nago gūkwifuula mu mhola.

¹⁰Nguno ūtīko kūnileka mu kūlimu, nūūlū ūtūneka ū Ng'wela wako ashike mu būkenaagūku.

¹¹Hū bebe ūkūnoolekeja ī nzīla ya būpanga, ū kūbiza hamò nang'ho gūlī mhayo gwa būyegi būtaale no, ū kū nkono gwako gwa būlyo būlīho būyegi bo welelo bose.