Read Sukuma Bible 2015 – Bibilia Ilagano Lya Kale 2015 Zabuli 17 Bible Online

Zabuli 17 - Sukuma Bible 2015 – Bibilia Ilagano Lya Kale 2015 bible

Zabuli 17

¹Zabuli ya kūlomba kwa ng'wa Daūdi. Kwigwage, Ee SEEBA, ū kūlomba kwane kwa būtūngīlīja, tegaga matū ūkūdegeleke ū kūlīla kwane; kūlīfuma mu nomo gūtī na būlomolomo.

²Ī ng'hana yane īfume kūlī bebe; a miso gako gabūbone ū būtūngīlīja.

³Nūūlū ūkīlola ī ng'holò yane gīkī ūnimane, nūūlū ūnigīsīlīja mu makanza ga būjikū, pyī nūūlū ūnigema, ūkūbona gīkī natī na būbi; ū nomo gwane nagūlemegije ū kūhūba.

⁴Ī ya shītīle sha banhū yaya, ū nene nalī wa kūlondeela katongeelele ka mhayo gwa kūfuma mu nomo gwako dūhū; nalemile ū kūlondeela nhūngwa ja biboneeji.

⁵Nilang'hanile nashimīzīle mu nzīla jako dūhū, Ī mhambala jane jitaalī kūchūūlūlūka.

⁶Ee Mulungu, nalīkwitana, nguno ūkūniidīka; gūtegage ū gūtū gwako, wīyigwe ī mihayo yane.

⁷Bebe ūyo ūkabapījaga na nkono gwako gwa būlyo abo bakizaga kūlī bebe bakūkoobaga kūpīla kūfuma kū banishi babo, boolechage ū būtogwa wako wa kūkumya.

⁸Nilang'hanage gītī mboni ya liso lyako, nibisage mu mbeho ya manana gako,

⁹nabīngīle a bahūnga abo bakūniiboneelaga, a banishi bane babūbi, abo banitingije ha gatī.

¹⁰Ī ng'holò jabo bajilugalile, batī na shigongo; Ī milomo yabo īkitagūlaga mihayo ya nyadooshi.

¹¹Bakikalaga būnikūūbīlīja, Ī haha nalī ha gatī baninyamile būlī kwene; banigoomhile na miso gabo, batogilwe banigwishe hasī.

¹²Balī gītī shimba īkūshimilīlaga mate īsho īlīshiteeba, gītī shimba songi yibandaga īkūkūngīlaga.

¹³Ee SEEBA, būkaga ūpamanye nabo, bagwishage ūwīnje ū būpanga bone ū mu makono ga bahūnga! Nipījage bo lūshū lwako.

¹⁴Ee SEEBA, nipījage ū kū banhū benabo; nipījage na nkono gwako ū kū banhū ba mu sī, abo ngabo gwabo gūlī mu būpanga ūbū. Abo ūbatogilwe ūkabigūtyaga ī nda jabo kūfuma mu shisho ūbabīkīlile; a baana babo nabo bakapandīkaga sha kūbigelwa, nabo babīka kūlwa baana babo.

¹⁵Nīyo nū nene nakūbūbona ū būshū wako mu būtūngīlīja; ūlū nūmisha nakūyega no ū kūkūbona ūmo ūlī.