Read Sukuma Bible 2015 – Bibilia Ilagano Lya Kale 2015 Zabuli 18 Bible Online

Zabuli 18 - Sukuma Bible 2015 – Bibilia Ilagano Lya Kale 2015 bible

Zabuli 18

¹Kūlwa ntongeeji wa bīmbi, Zabuli ya ng'wa Daūdi ntūmami o ng'wa SEEBA. Akang'wīmbīla SEEBA ī mihayo ya lyīmbo lyenīlī, ū SEEBA aho akampīja kūfuma mu makono ga banishi bakwe bose, na kūfuma mu makono ga ng'wa Saulo. Akahaya gīkī. Nakūtogilwe, Ee SEEBA, ū bebe ūlī nguzu jane!

²Ū SEEBA alī Shiganga shane, ipīlīlo lyane, na mpīja wane. Ū Mulungu wane h'ūyo alī shiganga shane, ū mulī we nakapīlīlaga. Hū ng'wene ūyo alī lūmūda lwane, na shilanga[6] sha kūnipīja; nīyo hū ng'wene al'ibūngīlo lyane lya kūpīlīla.

³Ū SEEBA ūyo igeleelilwe kūkumīlījiwa, nakang'witanaga, h'ī chene nakapīlaga kūfuma ū kū banishi bane.

⁴Ī ngoye ja kūcha jalī jiniitaligīngije; Ī mihūūmo ya būkenaagūji yūyūnidetemya.

⁵Nī ngoye ja kūlimu jalī jiniikonzeelile, Ī mitego ya kūcha nayo yūnikiimaalīla.

⁶Ū mu makoye gane nakang'witana ū SEEBA; nūnīlīīla ū Mulungu wane anipīje. Ng'hana ū mu hekalu yakwe ūliigwa ī lilaka lyane; ū kūlīla kwane kūmpandīka, kūshika ū mu matū gakwe.

⁷Hūna ī sī yūtingina na kūyebengūka; Ī misingi ya ngūlū īyūdetema na kūtandūka, nguno akasaaya.

⁸Lyūfuma lyochi ū mu mūūlū gakwe, lyūdundumūka lījile kwigūlya; na moto nkalī gūfuma ū mu nomo gwakwe, makala gapembekile moto gūfuma moi.

⁹Hūna ūlīlugūla ī ligūlū wika hasī, ū kū sīlīlī ya mhambala jakwe walī apīndiwe ilunde lyapi.

¹⁰Hanuma ūdamhīla ikelubi ūlala ajile; winunga ūlala alī ha manana ga lūyaga.

¹¹Ī giiti ūshigalūcha kūbiza ng'handa yakwe, a malunde ga mbula a madito a gapi gūbiza iheema lya kūmfīkīja.

¹²Būng'weku būtaale būyiiza kūfuma ū kūlī we, a malunde gakwe gūyiita mawe ga mbula, na makala ga moto.

¹³Ū SEEBA ūpalalūka ū mu malunde, Ī lilaka lyakwe ūyo Alī Higūlya no ligwiwa ū mu malunde, kūnū gakwidīkaga mawe ga mbula na makala ga moto.

¹⁴Ūgatūma a masonga gakwe, ūbasambaaja a banishi; ūtūma na būpalalūki būtaale na ndabi ningī, ūbapyena kīngī nasho nīyo.

¹⁵Ee SEEBA, ūkafuula myūyī na mūūlū gako, a mooma ga mu nyanza goolechiwa hape; ī misingi ya sī yigengeleka kūlwa kahamīle kako.

¹⁶Akalagīja kūfuma kwigūlya, ūnidima nkono; ūnizubūla kwīnga mu minzī mingī.

¹⁷Ūnipīja kwīnga mu nguzu ja ng'wanishi wane, nū mu makono ga banhū abo banikolilwe; abo baalī na nguzu kūniheeba ū nene.

¹⁸Bakiza kūnidumīla mu makanza ga makoye, alīyo ū SEEBA ūnihandīkīīja nīmīīla.

¹⁹Akanitūūla h'ipandī lya kwiyagaalūla; ūnipīja nguno walī anitogilwe.

²⁰Ū SEEBA waninhile mheela kūlenganīla na būtūngīlīja wane, waninong'hile kūlenganīla na wiza wa shītīle shane.

²¹Nguno ī nzīla ja ng'wa SEEBA najidimile; nataalī kūhūba mu kūneka ū Mulungu wane.

²²Nguno a kalamulīle kakwe a kose kalī kū būtongi bone, nataalī kūlekana nasho ī shilagīlo shakwe.

²³Ū kūlī we natī na gwa kūsaayīlwa, hangī nilang'hanile natizūgwa mu kwihīga.

²⁴Ū SEEBA waninhile mheela kūlenganīla na būtūngīlīja wane, kūlenganīla na wiza bo shītīle shane, gīt'ūmo akūnibonelaga.

²⁵Ū kū basanyiwa ūkiyoolechaga ūlī nsanyiwa, ū kū banhū abo batī na shilingo, nū bebe ūtī na shilingo,

²⁶ū kū beela ūkiyoolechaga ūlī ng'wela; alīyo ū kū bibonya, ūkiyoolechaga ūlī nkalī.

²⁷Nguno ūkabapījaga a bidohya, alīyo a ba mbyūla miso ūkabagoolaga.

²⁸Ū bebe h'ūlī macha wa tala yane, ū SEEBA Mulungu wane hū ng'wene akashigalūchaga ī giiti shane shabiza isana.

²⁹Kūlwa būgunanhi wako nadūgije kūpyena mabità; ū Mulungu wane ūlū alī hamò nane, nūūlū ndugu nakwitambūka.

³⁰Ū Mulungu ū ng'wene ī nzīla yakwe nshikanu; ū mhayo go ng'wa SEEBA gūtī na shilingo, ū wei alī lūmūda kū bose abo bakapeelelaga mulī we.

³¹Nguno nani ūngī ū Mulungu ūlū at'ū SEEBA? Nani ūyo alī shiganga, ūlū at'ū Mulungu wise iyene?

³²Ū Mulungu h'ūyo akaninhaga nguzu, nī nzīla yane hū ng'wene akīshikanyaga.

³³H'ūyo akajīītaga ī mhambala jane kūbiza gītī chūūga sha ngūlūgūlū; akanigunanhaga kwīmīīla ha mapandī ga higūlya.

³⁴A makono gane akagalangaga gamane būlūgū, nū kūgoma ū būta akagalangaga we.

³⁵Bebe waninhile lūmūda lwa būpīji wako, ū nkono gwako gwa būlyo gūnihandīkīīja; ū būfula wako būnīīta kūbiza munhū ntaale.

³⁶Wanigalīhīgije ī nzīla ya kūbītīla, nose ī mhambala jane jitīko kūchūūlūlūka.

³⁷A banishi bane nakaboolomya nhambo nūbapandīka, natanyamukile kūshisha būhūlūlūka pye.

³⁸Nakabamamaaja atabūūkile nūūlū ūmò, būlambalala hasī kū mhambala jane.

³⁹Nguno ūkaninha nguzu ja kūlwa mu būlūgū, a banishi bane ūbanyangīlīja ha sīlīlī yane.

⁴⁰A banishi bane ūkabahīnjūūla būnoolekeja ng'hooni jabo, abo banikolilwe nakabayagaja.

⁴¹Baalīla no, alīyo atigelile wa kūbaguna, nū SEEBA būyūnīlīīla, alīyo atabashokegije.

⁴²Hūna nūbashigina būnogela, būbiza gītī lūbuubu lwa kūlajiwa nyaga; hama nūbiita hanze gītī tembe mu mapanda.

⁴³Nū mu būgomi wa banhū ūkanipīja; Ī haha wanīītile kūbiza ntwe gwa mahanga, banhū abo naalī natabamanile bakūnitūmamīlaga.

⁴⁴Ūlū balwigwa ū lūkumo lwane bakwidohyaga, banhū bageni bakwiza bayūnigwīla mu magūlū.

⁴⁵A bose baagwile ng'holò ī haha, balīyiza bakūdetemaga kūfuma mu ng'hambī jabo.

⁴⁶Ū SEEBA ng'wene alī mpanga, akumīlījiwe ūyo alī Shiganga shane; agūngūhiwe ū Mulungu wa būpīji wane,

⁴⁷ū Mulungu ūyo akanimalīlaga shiilī, na a mahanga akagatūūlaga ha sīlīlī yane;

⁴⁸hū wei akanipījaga kūfuma kū banishi bane. Alichene, hū bebe wanigūngūhije, ūnitūūla higūlya yabo abo banikolilwe; wanipīgije ū mu nkono gwa biboneeji.

⁴⁹Alilūūlū Ee SEEBA, nakūkūlūmba ha gatī ya mahanga, nakwīmba kūlwa kūlīkumīlīja lina lyako.

⁵⁰Akang'winhaga būtindi būtaale ū ntemi wakwe, akanchīlaga shigongo ū ng'witīīlwa maguta wakwe, h'ū Daūdi, nū būbyīle wakwe, shikū ja welelo bose.