Read Sukuma Bible 2015 – Bibilia Ilagano Lya Kale 2015 Zabuli 2 Bible Online

Zabuli 2 - Sukuma Bible 2015 – Bibilia Ilagano Lya Kale 2015 bible

Zabuli 2

¹Nibūlī a mahanga gakūpelanaga, na a banhū bakūlyaga gwīnda ya dalali?

²A batemi ba mu sī bakūlomanaga; na a basugi bakwibilingaga mabanza mabanza, gīkī bilwishe nū SEEBA, hamò nū Kilisto wakwe!

³Bakwiwīlaga, “Tūjitīnagūlagi ī nhendele jabo, nī minyololo yabo twīponanje.”

⁴Ūyo igashije ng'wigūlū h'isumbī lya būtemi akūsekaga, ū SEEBA abadalahile.

⁵Hūna akūbahama mu būkalī bokwe, na kūlwa būpelanu bokwe akūbadetemya akūbawīlaga gīkī,

⁶“Naatūūlile Ntemi wane a ha lūgūlū lwane lwela, ū lwa Sayuni.”

⁷Nakūshikumūcha ī shilagīlo sha ng'wa SEEBA: Waniwīlile gīkī, “Ū bebe ūlī Ng'wana wane, Ī lelo yenīyī naakūbyalaga.

⁸Nilombage, a mahanga nakūgīīta gabize wingīji wako, ī sī jose jikūbiza jako.

⁹Ūkūbasuga na nang'ha gwa chūma, ūkūbataalīka babelagūke gītī shiseme sha mabūmba.”

¹⁰Alilūūlū bing'we batemi, Ītagi masala; bingwe basugi ba sī chagūkagi.

¹¹Ntūmamīlagi ū SEEBA mu logohano, nyegelagi kūnū mukūzugumaga.

¹²Mbipagi ū Ng'wana,[1] atizūpelana mukayagaalīla mu nzīla jing'we. Nguno ū būpelanu bokwe wangū kūbaka. Balī na pye abo bakapīlīlaga mulī we.