Read Sukuma Bible 2015 – Bibilia Ilagano Lya Kale 2015 Zabuli 20 Bible Online

Zabuli 20 - Sukuma Bible 2015 – Bibilia Ilagano Lya Kale 2015 bible

Zabuli 20

¹Kūlwa ntongeeji wa bīmbi. Zabuli ya ng'wa Daūdi. Ū SEEBA akwigwe ū mu lūshikū lwa makoye, ī lina lya ng'wa Mulungu o ng'wa Yakobo līkūlang'hane.

²Akūtūmīle būgunanhi kūfuma ng'wipandī lyeela, na akūguzuhye kūfuma Sayuni.

³Ashizūkwe ī shakwinha shako shose, na ashanukūle ī shitambò shako sha kūpemvwa.

⁴Akwinhe īyo ng'holò yako īkwīkoobaga, na akūshikīlīgīje ī yose īyo ūkwīhelaga.

⁵Tūkūyega na kūtūla mhūndū kūlwa būpyeni wako; mu lina lya ng'wa Mulungu wise tūkūjinunja ng'wigūlya ī mbembeela jise. Ū SEEBA akūshikīlīgīje ū kūlomba kwako kose.

⁶Ī haha naamanaga gīkī, ū SEEBA hū ng'wene ū mpīja wa ng'witīīlwa maguta wakwe; akūng'wigwa kūfuma ng'wigūlū lyakwe lyeela, na akūnshokeja mu būpīji kūlwa būdūla bo nkono gwakwe gwa būlyo.

⁷Bamò bakūsanyaga magogoteni, bangī falasa; alīyo a bise tūkūlīsanya lina lya ng'wa SEEBA Mulungu wise.

⁸A benabo bakwipama bagwe; alīyo a bise tūkūgūngūmūka twīmīīle hīgīyī.

⁹Ee SEEBA, mpījage ū ntemi! Tūshokejage ū mu kwitana kwise.