Read Sukuma Bible 2015 – Bibilia Ilagano Lya Kale 2015 Zabuli 21 Bible Online

Zabuli 21 - Sukuma Bible 2015 – Bibilia Ilagano Lya Kale 2015 bible

Zabuli 21

¹Kūlwa ntongeeji wa mīmbo. Zabuli ya ng'wa Daūdi. Ee SEEBA, ū ntemi akūyegelaga mu nguzu jako; nīyo alī na būyegi būtaale no kūlwa būpyeni wako.

²Wang'winhile īyo ayīkūmbūlile mu ng'holò yakwe; na ūtanemegije īsho akūlombaga na nomo gwakwe.

³Wang'wanukūlile ūng'winha ningī, hūna ūnzwīka ngikili ya zahabu niiza.

⁴Akakūlomba būpanga ūng'winha; nīyo ūng'winha būlamu wa kūshinga ho shikū ja welelo bose.

⁵Ī likūjo lyakwe līl'itaale no kūlwa nguno ya būpīji wako; wang'hangamije, ūnzwīka būdūla.

⁶Bebe wang'winhile ja kūshinga ho welelo bose, ūnyeja no no no nguno ūlī hamò nang'hwe.

⁷Nīyo īkī ū ntemi ansanije ū SEEBA, hūna lūūlū kūlwa shigongo shitaale shakwe ūyo Alī Higūlya no, atīko kūtinginyiwa.

⁸Ū nkono gwako gūkūbapandīka pye a banishi bako; ū nkono gwako gwa būlyo gūkūbapandīka a banishi bako.

⁹Ū ng'wikanza lya kwilonga kwako, ūkūbīīta babize gītī liiko lya moto. Ū SEEBA akūbagabbula kūlwa būpelanu wakwe, ū moto gwakwe gūkūbabuugīlīja.

¹⁰Ū būbyīle wabo ūkūbūkenaagūla būshile ū mu sī; pye a babyalwa babo bakūshila ū mu banhū.

¹¹Nūūlū īkī bakūsīīganaga kūkwītīla yabūbi, na kwikala bakūdosaga ya malofu, alīyo nahene batūbbyedecha.

¹²Nguno bakūpeela babbalasane ūlū ūbasolela būta wako kūyūbalīngīsīīla kū būshū.

¹³Ee SEEBA, lyolechage ī likūjo lyako ū mu nguzu jako, tūkwīmba na kūbūkumīlīja ū būdūla wako.