Read Sukuma Bible 2015 – Bibilia Ilagano Lya Kale 2015 Zabuli 22 Bible Online

Zabuli 22 - Sukuma Bible 2015 – Bibilia Ilagano Lya Kale 2015 bible

Zabuli 22

¹Kūlwa ntongeeji wa bīmbi; ng'wilaka lya Saala ng'hīma mu makanza ga dilū. Zabuli ya ng'wa Daūdi. Mulungu wane, Mulungu wane, nibūlī wanilekaga? Ni kinehe ūlī kūle gīko ūtūnigunanhaga, ūlī kūle nī mihayo ya kūlīla kwane?

²Mulungu wane, līīmi na būjikū nakūlīlaga natī na kwifuula, alīyo ūtūnishokejaga.

³Kwike nahene ū bebe ūlī ntemi, ūlī Ng'wela, na ūl'ikūjo lya Baisilaeli.

⁴A bakūlūgenji bise baalī bakūsanije; Īkī baalī bakūsanije, nang'ho wabapījaga.

⁵Baakūlīlīīlaga bapīla ng'hana, kūlwa kūkūsanya batagookile.

⁶Alīyo ū nene nalī igino dūhū, natī munhū yaya, nalī ndalahwa wa kwikala akūsekagwa na banhū.

⁷Pye abo bakanibonaga bakaniineenelegejaga, na kūnisondagūla; kūnū bakūshingishaga mitwe yabo,

⁸balīhaya; “Walihamba hambaga kūnsanya Mulungu, ni ampījage lūūlū ī haha īkī anyegelile.”

⁹Alīyo hū bebe ūkanīnja ū mu nda ya ng'wa mayū, nūūlū aho nalī ha lūbeele lo ng'wa mayū, naalī nakūsendamīlile bebe.

¹⁰Kūfuma kūbyalwa kwane nalī kū būtongi wako; kwīngīīla na a haho nalī mu nda ya ng'wa mayū, ū bebe ūlī Mulungu wane.

¹¹Ūtīzūnisegenela, nguno a makoye galī bbihī no, alīyo ū nguni atīho.

¹²Mayagamba mingī ganigobanīlaga, mayagamba ga nguzu ga Bashani ganipīndyaga.

¹³Ganasamīlaga milomo yago, gakūzuumīīlaga gītī mashimba gatuubile.

¹⁴Ū mīlī gwane gwamalaga ī nguzu, gwabizaga gītī minzī gakwidīkaga; pye a maguha gane gayogomaga. Ī ng'holò yane ū mu shikuba shane yaabaga gītī būgondo.

¹⁵Namalaga ī nguzu, nalī gīt'ipeenu lya lūjo; ū lūlīmi lwane lwadamīīlaga kwilangū, nakūgalagalaga mu lūbuubu lwa lūfu.

¹⁶Mvwa janipīdyaga hose hose, ibità lya banhū babūbi lyanigobanīlaga; a makono na a magūlū gane balīgachimagūla.

¹⁷A maguha gane nadūgije kūgisaaba a gose, a banishi bane baanikalalīlaga, nīyo balīyūnibyūlīla mu kūnidalaha.

¹⁸Ī shizwalo shane bashigabanhaga, būgwesela mbale ū ng'wenda gwane.

¹⁹Ee SEEBA, ūtanisegenelage, bebe ūyo ūlī nguzu jane, nangūhīlage ūnigune.

²⁰Ū būpanga bone būlī bo mpango no, būpījage ū kū līlūshū, būgunage ū kū nguzu ja mawa.

²¹Nipījage kūfuma ū mu nomo gwa mashimba; nipījage nū kū mapembe ga mayīkū masaji.

²²Ī lina lyako nakūlīkumūcha ū kū bang'wise; nakūkūkumīlīja ha gatī y'ibità.

²³Bing'we abo mung'ogohile ū SEEBA, nkumīlījagi, bose pye a ba būbyīle bo ng'wa Yakobo, nkūjagi we; bing'we baana ba ng'wa Isilaeli, ng'ogohagi!

²⁴Nguno atīko kūndalaha ū ng'wiboneelwa, nūūlū atīko kūnekanīja ang'winhīle ngongo; alīyo akang'wigwaga ūlū ūnīlīīla.

²⁵Ūlū nalī ng'wibità itaale, ū kūkumīlīja kwane kūkafumaga kūlī bebe; ī shilahīlo shane nakūshishikīlīja kū būtongi wabo abo bakogohile bebe.

²⁶A bahabī bakūlya bigūte, abo bakankoobaga ū SEEBA bakūnkumīlīja; ī ng'holò jing'we ni jilamage shikū jose welelo na welelo.

²⁷A banhū ba mu sī jose bakwizūkwa banshokele ū SEEBA; nī shibyalīlwe shose ī sha mahanga ga banhū shikūnamya we.

²⁸Nguno ū būsugi būlī bo ng'wa SEEBA, hū ng'wene ūyo agasugile a mahanga.

²⁹Pye a basabi ba mu sī bakwigūta balamye; na a babo bakūshokaga kūbiza lūbuubu, abo batīko kūlang'hana ng'holò jabo jitizūcha, a bose bakūntugīja mazwi we.

³⁰Banhū ba būbyīle ūbo būliza bakūntūmamīla; Ī shibyalīlwe sha kū shikū ja kū būtongi, shikūwīlwa ī ya ng'wa SEEBA.

³¹Ū būtūngīlīja wakwe bakūbūlomeela nū kū banhū abo bataalī kūbyalwa, gīkī hū ng'wene wagwītile ū gwenūyū.