Read Sukuma Bible 2015 – Bibilia Ilagano Lya Kale 2015 Zabuli 28 Bible Online

Zabuli 28 - Sukuma Bible 2015 – Bibilia Ilagano Lya Kale 2015 bible

Zabuli 28

¹Zabuli ya ng'wa Daūdi. Nalīkwitana bebe, Ee SEEBA, bebe ūyo ūlī Shiganga shane; yaya ū kūbiza gītī ūlī gulu ū kūlī nene. Nguno ūlū ūnihuumūlīla, nakūbiza gīt'abo bakajaga ng'wichongo.

²Ūlū nalīkūlīlīīla gīkī ūnigune, kūnū nabūūkije makono gane kūlola kwipandī lyako lyeela no no no, ligwage ī lilaka lya kwikūmbīlīja kwane.

³Ūtizūnikūmba ng'wigelè līmò na bakenaagūji, abo bakipogejaga mhola na bazenganwa bichabo, alīyo ū mu ng'holò jabo babisile būbi.

⁴Bagabīlage kūlenganīla nī shītīle shabo, kūlenganīla nū būbi wa shītwa shabo; bagabīlage gīt'ūmo īlī nhūmamīle ya makono gabo, binhage ī mheela īyo ībigeleelilwe.

⁵Ū SEEBA akūbakambagūla, hama atūbazenga hangī, nguno batīdīlīlile ī mīlīmo yakwe na a katūmamīle ka makono gakwe.

⁶Akumīlījiwe ū SEEBA, nguno waliigwile ī lilaka lya kwikūmbīlīja kwane.

⁷Ū SEEBA alī nguzu jane na lūmūda lwane, Ī ng'holò yane yīnsendamīlile we, h'ī chene nakagunanhagwa. Ī ng'holò yane īlī na būyegi būtaale no, nakūng'wīmbīla lyīmbo lya kūnūmba.

⁸Ū SEEBA alī nguzu ja banhū bakwe, ū kūlī ng'witīīlwa maguta wakwe, al'ipandī lya kūbūngīlà.

⁹Bapījage a banhū bako, ūwīīlūkīle ū wingīji wako; badīīmage, ūbabūūche shikū ja welelo bose.