Read Sukuma Bible 2015 – Bibilia Ilagano Lya Kale 2015 Zabuli 3 Bible Online

Zabuli 3 - Sukuma Bible 2015 – Bibilia Ilagano Lya Kale 2015 bible

Zabuli 3

¹Zabuli ya ng'wa Daūdi, ng'wikanza lya kūmpeela ng'witūnja wakwe Abusalomu. Ee SEEBA, baakwīlile shido a banishi bane! Abo bakūnūūbūkīlaga balī bingī no!

²Bingī bakwiwīlaga balīnihaya gīkī, “Ū Mulungu atīko ū kūnguna ū ng'wenūyo.”

³Alīyo ū bebe SEEBA ūnikīngītīīlile gītī lūmūda, ūl'ikūjo lyane na ngūngūhya wane.[2]

⁴Ū nene nakanīlīīlaga ū SEEBA n'ilaka lya higūlya, nang'hwe akanishokejaga kūfuma mu lūgūlū lwakwe lwela.

⁵Ūlū nalaala nakapandīkaga tūlo, nū kūmisha nakamishaga, nguno ū SEEBA ngunanhi wane.

⁶Natīko kūbogoha a banhū abo banipīndije mhandī jose, mabità makūmi ga shihūmbī.

⁷Būūkaga Ee SEEBA! Ee Mulungu wane, nipījage! Nguno pye a banishi bane wabatūlile kū saya; a bahūnga wababīnzagūlile a mino.

⁸Ū būpīji būlī bo ng'wa SEEBA, Ī jako ni jibizage kū banhū bako.