Read Sukuma Bible 2015 – Bibilia Ilagano Lya Kale 2015 Zabuli 30 Bible Online

Zabuli 30 - Sukuma Bible 2015 – Bibilia Ilagano Lya Kale 2015 bible

Zabuli 30

¹Zabuli ya ng'wa Daūdi, lyīmbo h'ikanza lya hekalu kūlombelwa mbango. Ee SEEBA, Nakūkūkumīlīja no no no, nguno wanigūngūmūlile, a banishi bane ūtabalekile būniboneela.

²Ee SEEBA Mulungu wane, nakakūlīlīīla gīkī ūnigune, na ng'hana ūnipīja.

³E SEEBA, ū būpanga bone owīngije mu kūlimu, wanilang'hanile nikale mpanga, natizūbiza ūmò wa babo bakūjaga ng'wichongo.

⁴Ng'wīmbīlagi mīmbo ga kūngongoola ū SEEBA a bing'we beela bakwe, nūmbagi kūlwa lina lyakwe lyeela.

⁵Nguno ū būpelanu bokwe būlī w'ikanza iguhī no, alīyo ī shigongo shakwe, shene sha kūshinga ikanza lyose lya būlamu. Ūdūgije kūlīla nūūlū būjikū pe, alīyo ū mu dilū būkūbiza ho būyegi.

⁶Ū ng'wikanza lya kwīlūkīlwa kwane, nakahaya; “Ū nene natīko kūtinginyiwa.”

⁷Ee SEEBA, aho walī ūniyegelile, walī waninha nguzu ja kwīmīīla gītī lūgūlū, alīyo aho wabūbisa ū būshū wako nūzwangana.

⁸Ee SEEBA, Nakakūlīlīīla bebe; ū SEEBA nakang'wikūmbīlīja nalīhaya:

⁹“Īkwilonga solobo kī ū mu kūcha kwane, ūlū nūja ng'wichongo? Ū lūbuubu lūkūkūkumīlīja? Lūkūbūkumūcha ū būtūngīlīja wako?

¹⁰Igwaga, Ee SEEBA, ūnichīle shigongo; Ee SEEBA, bizaga ngunanhi wane.”

¹¹Ī ng'hūngū yane wīgalūkije yūbiza būyegi na mbina; wanizuugije ī shizwalo sha magūnīla, ūnizwīka būyegi,

¹²gīkī ī ng'holò yane īkwīmbīle, natizūfulīka sele. Ee SEEBA Mulungu wane, nakūkūlūmba shikū jose welelo na welelo.