Read Sukuma Bible 2015 – Bibilia Ilagano Lya Kale 2015 Zabuli 33 Bible Online

Zabuli 33 - Sukuma Bible 2015 – Bibilia Ilagano Lya Kale 2015 bible

Zabuli 33

¹Yegelagi mulī SEEBA bing'we batūngīlīja, abo nzīla jabo jigoloolile ībigelile ū kūkumīlīja.

²Nkumīlījagi ū SEEBA na ndono, ng'wīmbīlagi kūnū mukūngongoolaga na malimba.

³Ng'wīmbīlagi lyīmbo ipya, jitūlagi ī ndono mu būgaliili, kūnū mukūtūlaga na mhūndū mu būyegi.

⁴Nguno ū mhayo go ng'wa SEEBA gūtūngīlīgije; na alī nsanyiwa mu yose īyo akīyītaga

⁵Ū SEEBA atogilwe būtūngīlīja na būdeeba mu kalamulīle; ī sī yokalile būtogwa wakwe ūbo būtī wa kūshila.

⁶Ū SEEBA akagabeeja a mapandī g'igūlū bo mhayo gwakwe, na a mabità gaamo pye a gose ūgabeeja bo myūyī yakwe.

⁷A minzī ga mu nyanza akagakumingaga gabiza gītī galī h'itūūgo; ū būjiba akabūtūūlaga mu mabīkīlo gakwe.

⁸Sī jose ni jing'ogohage ū SEEBA, pye a bikaji ba mu sī bankūje we;

⁹Nguno akahaya, ī shose shūbiza ho; akalagīla, na ng'hana yūja ūmo īlī.

¹⁰Ū SEEBA akabipyaga long'we ja banhū ba mahanga, a banhū akabasambaagūjaga kahelele kabo.

¹¹Alīyo īyo ayīhelile ū SEEBA, yīmīīlile ilalī ūmo īlī; īyo ayīhelile mu ng'holò yakwe kūlwa shikū ja welelo bose.

¹²Līlī na ī lihanga īlo ū SEEBA alī Mulungu walyo, a banhū abo abasolile kūbiza wingīji wakwe.

¹³Ū SEEBA akalolaga kūfuma ū ng'wigūlū, akababonaga pye a banhū.

¹⁴Kūfuma ū ng'wipandī lya wikalo wakwe, akabalolaga pye a bikaji ba mu sī.

¹⁵Hū wei akababeegejaga ng'holò pye a banhū, na būlī gwene ūyo bakagwītaga agūdīlīlile chiza no.

¹⁶Ū ntemi atapījiagwa wingī wa bashilikale bakwe, na atīho nshilikale wa kūpīla Īkī alī na nguzu ningī.

¹⁷Ī falasa ītīko kūpīja munhū, nūūlū īkī īlī na nguzu, nahene ītūdūla kūpīja.

¹⁸Alīyo abo bang'ogohile ū SEEBA, abo kwisagīlwa kwabo kūlī ha būtogwa wakwe ūbo būtī wa kūshila,

¹⁹akabūlang'hanaga ū būpanga wabo batizūcha, nū mu shikū ja nzala akabapījaga bikala mhola.

²⁰Ū būpanga wise būnindīīlile SEEBA; ū wei alī ngunanhi na lūmūda lwise.

²¹Ī ng'holò jise jikūnyegelaga wei; nguno tūlīsanije ī lina lyakwe lyeela.

²²Ee SEEBA, ī shigongo shako ni shibizage hamò nise; gīt'ūmo kwisagīlwa kwise kūlī mulī bebe.