Read Sukuma Bible 2015 – Bibilia Ilagano Lya Kale 2015 Zabuli 35 Bible Online

Zabuli 35 - Sukuma Bible 2015 – Bibilia Ilagano Lya Kale 2015 bible

Zabuli 35

¹Zabuli ya ng'wa Daūdi. Ee SEEBA, bahamage, abo bakūnidumīlaga, lwaga nabo bebe abo bakūnūūbūkīlaga.

²Dimaga lūmūda, na a kalūmūda a kado ūkasole; īmīīlaga ūnigune.

³Abo bakūnikūūbīlījaga basolelage ichimu na someke; ū būpanga bone būwīlage gīkī, “Ū nene hū nalī būpīji wako!”

⁴Abo bakūbūkoobaga ū būpanga wane bading'we soni, na bagooke; na a babo bakūnisīīgaga mihayo yabūbi, bashoshiwe kū numa, na bazwangane.

⁵Babize gītī meela gakūlajiagwa nyaga, kūnū ū malaika o ng'wa SEEBA akūbadalajaga.

⁶Babīte mu giiti na būnhyūūlūlū, ū malaika o ng'wa SEEBA akūbadoolomyaga.

⁷Baanitegile ntego mu mbisīla nī nguno ītīho, ū būpanga wane būbūsīmbīla ichongo nū mhayo ndūhū.

⁸Ni bagwīlagwe mayanga mu kwifumbūkījiwa; ū ntego ūyo baanitegile gūbagwashe boi benekīlī, bagwīle ū ng'wichongo īlo baanisīmbīlile nene.

⁹Hūna ū būpanga bone būkūyegela mulī SEEBA, hamò na kūlūmba kūlwa būpīji wakwe.

¹⁰Na a maguha gane a gose gakūhaya gīkī, “Nani ūngī ūyo abange gītī bebe, Ee SEEBA? Ū bebe ūkabagunaga a bahabī ū kū ba nguzu, ūkabapījaga a bahabī na a ba makoye, wabīnja ū mu nkono gwa nyeecha.”

¹¹Bakaanīji biboneeji bakwīmīīlaga, bayūnibyaagīja mihayo īyo natīmanile nūūlū hado.

¹²Bakūnilīpīlaga mibi ū kū misoga īyo nakwītaga, Ī ng'hūmbū jabo jilī ha kūnigwisha ng'holò.

¹³Alīyo a boi ūlū bakūsaataga, ū nene naaliluhyaga mu kūzwala magūnīla, nidohya mu kūluha kwa kūfunga. Ū kūlomba kwane ūlū naleka ū kūshokejiwa,

¹⁴naalūlīlaga būpīna gītī nakūnīlaga nwani ng'wichane nūūlū ng'wanong'wise. Naaliyinamīīlaga ū ntwe kūlwa būpīna, gītī nakūlīlaga ng'hūngū nachīlagwa mayū.

¹⁵Lelo ū nene nahayilipama, a bene bandya kwiyalīlīja mu būyegi, bakwibilingaga gīkī banidumīle. Na banhū bashila shilile hose, abo nūūlū kūbamana natabamanile, būyikala bakūnisīīgaga līīmi ji.

¹⁶Kūlwa nhūngwa jabo ja malofu, bayūnineenelekeja mu nyadalahi, kūnū bakūniilumīlaga ng'haya!

¹⁷Ee SEEBA, ūkwikala ūbalolile dūhū kūshisha nanalī? Nipījage kūfuma ū mu būkenaagūji wabo; būpīle ū būpanga wane ū kū mashimba genaya.

¹⁸Hūna nakūkūlūmba mu kwibilinga kūtaale, nakūkūkumīlīja mu mabità ga banhū bingī.

¹⁹Abo bakūnīītīlaga wanishi mu kūniboneela, ūtizūbaleka bikumīlīje kūlwa kūniheeba; na a babo banikolilwe na mhayo yaya, ūtizūbazunīlīja bikale bakūnishilimaga nū mhayo ndūhū.

²⁰Nguno batalūngalūngaga mihayo ya mhola, ūlū ītī kwikala bakūdosaga būlomolomo dūhū, kūlwa kūbalembekeja a balembeezu abo balīho ū mu sī.

²¹Bakikalaga būnaasamīla milomo yabo bakūhayaga, “Ee ī yenīyo twibonile na miso gise!”

²²Ee SEEBA, ūtahuumūlage nguno ūkwībonaga ī yenīyī, yaya ū kwinūūna ūnileke SEEBA.

²³Mishaga, būkaga ūnigune; Bebe Mulungu wane na Seeba wane, nilwīlīīlage.

²⁴Ee SEEBA, Mulungu wane, nigunījage kūlwa būtūngīlīja wako; nīyo ūtizūbaleka badoose kūlwa kūniheeba.

²⁵Yaya ū kūbaleka bikumīlīje balīhaya, “Yū gīko shi, yaja ūmo twalī tūtogelilwe!” Na, “Twangoloola ū ng'wing'wana!”

²⁶Abo bakūyegaga ūlū nagwa mu mayanga ni bagookage, nīyo babbūūlīhe; na a babo bakwikumīlījaga mu kūnidalaha, leka bagishiwe minala na kūpondwa soni.

²⁷Alīyo abo bakalūmbaga ūlū nabonekana gīkī nalī mpyeni, ni bayegage na kūtūla mhūndū; nīyo būlī gwa bayūhaya, “Akumīlījiwe ū SEEBA, ūyo akayegaga ūlū yameelela ī mihayo ū ntūmami wakwe.”

²⁸Hūna lūūlū ū lūlīmi lwane lūkūkumūcha ya būtūngīlīja wako, na y'ikūjo lyako līīmi ji.