Read Sukuma Bible 2015 – Bibilia Ilagano Lya Kale 2015 Zabuli 37 Bible Online

Zabuli 37 - Sukuma Bible 2015 – Bibilia Ilagano Lya Kale 2015 bible

Zabuli 37

¹Zabuli ya ng'wa Daūdi. Yaya ū kūfung'wa ng'holò kūlwa banhū ba malofu, yaya nūūlū kwīta wilu kūlwa bīīti ba mihayo mibi.

²Nguno bakūnyaala wangū no gītī maswa, batūdīīla ū kūūma gītī madūūtū madoto.

³Ū bebe nsanyage SEEBA dūhū, wikale ūkwītaga yawiza; ūkūlama ū mu sī ong'heele shizeeze, na kūyegela mu mhola.

⁴Yegelaga ū mulī SEEBA, nang'hwe akūkwinha īsho ng'holò yako īshikalalilwe.

⁵Ntūūlīlage SEEBA ī nzīla yako; ūnsanye we, nang'hwe akwīta.

⁶Ū būtūngīlīja wako akūboolecha hape gītī isana lya dilū; nī ng'hana ū mu kashimīzīle kako, īkwaka gītī līīmi līlī ntwe gatī.

⁷Lembeelaga ū kū būtongi bo ng'wa SEEBA, ūnindīīle mu kwiyūmīlīja; yaya ū kūfung'wa ng'holò kūlwa munhū ūyo akatūmamīlaga būnyeecha ūlū wīlūkīlwa ū mu nzīla jakwe.

⁸Ilemejage ū kūpelana nūūlū ū kūsaaya; yaya ū kūfung'wa ng'holò, nose ūkwingīla mu būkenaagūji.

⁹Nguno a banhū babūbi bakūponyiwa; alīyo abo bang'wisagīlilwe SEEBA, bakwinhwa sī ya wingīji.

¹⁰Kashiigaga kakanza kado no, ū munhū wabūbi abize atīho; nūūlū ūkankooba na kinehe aho walikalaga, ūtūmpandīka ho.

¹¹Alīyo a bidohya bakwinhwa sī ya wingīji, na bakūyega kūlwa wingī wa mhola.

¹²Ū munhū wa malofu akang'helelaga mibi ū ntūngītīja, na akang'wilumīlagwa ng'haya.

¹³Alīyo ū SEEBA akansekaga ū wa malofu; nguno amanile gīkī ū lūshikū lwakwe lūliza.

¹⁴A ba malofu bakasopoolaga shū jabo, na būta bakabangaga, balīlīīlile kūbagwisha a bahabī na a babo batī na shose shose; bakoobile kūbabūlaga a ba nhūngwa ngololoku.

¹⁵Alīyo ī shū jabo jikūbachima mu ng'holò jabo boi benekīlī, nū būta wabo būkūbīnzagūka.

¹⁶Ī shigehu īsho alī nasho ntūngīlīja, shilī na mpango ntaale no, kūtinda sabo ja bahūnga hū'mo jikwīlīle.

¹⁷Nguno ū ng'hūnga akūbīnzwa a makono; alīyo ū SEEBA akabaguzuhyaga a batūngīlīja.

¹⁸Ī shiku ja banhū abo batī na būbi, jibaladilwe na SEEBA; nū wingīji wabo būlī wa kūshinga ho shikū jose.

¹⁹Batīko kūgooka ū ng'wikanza lyabūbi; nūūlū mu shikū ja nzala bakūpandīka ī sha kūbigela.

²⁰Alīyo a ba malofu bakūyagaala; a banishi ba ng'wa SEEBA bakūbiza gītī wiza bo maswa mu madīīmīlo; bakūshila ho, bakūsambaala gīt'ūmo lyochi līkasambaalīlaga.

²¹Ū ng'hūnga akalandaga alīyo ndūhū ū kūshosha, alīyo ū ntūngīlīja ng'wene akinhaga mu wiila.

²²Abo bīīlūkīlwa na SEEBA, Ī sī īkūbiza wingīji wabo, alīyo abo abazumile, bakūponyiwa.

²³Ū SEEBA ahelile a kashimīzīle ka ng'wa munhū, na akanguzuhyaga ūyo nzīla yakwe wīyegela;

²⁴nūūlū ūgwa atūlambalala ilalī, nguno ū SEEBA andimile ū nkono gwakwe.

²⁵Ī haha nanamhaalaga, alīyo kūfuma ha būnīgīnī wane kūshisha makanza aya, nataalī kūmona ntūngīlīja walekanījiagwa, nūūlū baana bakwe gīkī baje bakwilombelejaga shilīwa.

²⁶Ū wei ng'winhi wa gwa na gwa, na azunije a banhū kūsola magasa ū kūlī we, hūna lūūlū a baana bakwe balī na mbango.

²⁷Lekanaga nayo ī yabūbi, wīte yawiza; ū mu gīko hū ūkwikala mhola ilalī.

²⁸Nguno ū SEEBA abūtogilwe ū būtūngīlīja, atīko kūbaleka a beela bakwe. A benabo bakūlang'hanwa welelo bose; alīyo a baana ba malofu bakūponyiwa.

²⁹A batūngīlīja ī sī īkūbiza wingīji wabo, bakwikala mo shikū ja welelo bose.

³⁰Ū nomo gwa ntūngīlīja gūkayombaga mideekanu, nū lūlīmi lwakwe lūkalūngalūngaga ītūngīlīgije.

³¹A malange ga ng'wa Mulungu wakwe galī mu ng'holò yakwe; ū mu shimīzīle yakwe atī nelengetu.

³²Ū nkenaagūji akangomhaga ū ntūngīlīja, Ī ng'hūmbū jakwe jilī gīkī amūlage;

³³alīyo ū SEEBA atūneka mu makono gakwe, nūūlū kūnekanīja kū būtongi wa balamuji bang'wiboneele.

³⁴Ū bebe nsanyage dūhū ū SEEBA, ūdimane nayo ī nzīla yakwe; nang'hwe akūkūgūngūhya ūdūle kwīdima ī sī. A babūbi ūkūbiloolela bakūkenaagūlagwa.

³⁵Nakamona munhū nebe wabūbi jigi, alīyo walī wahama no gītī ntī gwitogwa sī.

³⁶Kwike atadīlile ūgaya ho, ūbiza wabīta; nakalola nalolile gīkī namone, atabonekanile hangī nūūlū hado.

³⁷Ū munhū ūyo atī na būbi nolage gete; ng'wideedeng'hanyage ū munhū wa shimīzīle īgoloolile; ū munhū wa mhola ū kū būjiiwa alī na būbyīle.

³⁸Alīyo a bakenaagūji bakūyagajiwa pye a bose, ū būbyīle wa banhū ba malofu būkūponyiwa.

³⁹Ū būpīji wa batūngīlīja būfumile kūlī SEEBA; ū wei h'alī nguzu jabo ū ng'wikanza lya makoye.

⁴⁰Ū SEEBA akabagunanhaga, na akabapījaga, akabīnjaga ū mu nkono gwa babūbi, wabapīja; nguno bakabūngīlàga mulī we.