Read Sukuma Bible 2015 – Bibilia Ilagano Lya Kale 2015 Zabuli 39 Bible Online

Zabuli 39 - Sukuma Bible 2015 – Bibilia Ilagano Lya Kale 2015 bible

Zabuli 39

¹Kūlwa ntongeeji wa bīmbi, kūlī Yudusuni. Zabuli ya ng'wa Daūdi. Nakahaya, “Ī nzīla jane nakūjilang'hana, nū lūlīmi lwane nalūhame lūtizūningīja mu shibi. Hama ū ng'wikanza lyose īlo babūbi balī hamò nane, ū nomo gwane nakūgūtunga itungījo.”

²Naalī naahuumulile sele nūlembeela, nooya ū kūyomba nūūlū ni mhayo gwawiza; alīyo nahene a makoye gane hū gongeja dūhū ū kūkwīla.

³Ī ng'holò yane yūseba ū mu gatī yane; aho nongeja ū kwideedeng'hanya, ū būsebu wenūbo būbiza gītī moto, nose nūyomba hape gīkī,

⁴“Ee SEEBA, nimanīkījage ī ng'halīlo ya būpanga wane, nī lisaabu lya shikū jane; nabūmane ū būguhī wa būpanga wane ūmo būlī.

⁵Ī shikū jane ī ngehu īji hū bebe ūlī meeja wajo; ū kūlī bebe ī myaka ya būlamu wane Ītikīlile na kūdūhū. Ū būpanga bo ng'wa munhū būbange gītī lūyaga dūhū ū kūlī bebe.

⁶Na ng'hana ū munhū akayela yelaga ūko na ūko, alīyo atikīlile na nengeeji dūhū; akatagambaga alīyo ndūhū ū gwa kūpya. Akabilingījaga sabo, alīyo atamanile ni nani akūjisola pyī ī jose.

⁷Al'ī haha lūūlū Seeba, nalindīīlile kī? Ū kwisagīlwa kwane kūlī mulī bebe.

⁸Nipījage nīnge ū mu būkenaagūji wane; yaya ū kūnīīta nabize ndalahwa kū babbūūlī.

⁹Ū nene naahuumūlile natūkundūla nomo gwane; nguno hū bebe ūlī ng'wīti wayo ī yenīyī.

¹⁰Nīngījage ū nang'ha gwako ūyo gūlīnitūla, nose a katūlīle ka nkono gwako kanimalaga.

¹¹Ū bebe ūkabahamaga a banhū, na kūbahūgūla kūlwa shibi shabo; ūkabakenaagūjaga ī sabo jabo gītī fufuuji; na ng'hana ū munhū atikīlile na lūyaga.

¹²Ee SEEBA, kwigwage ū kūlomba kwane, kwigwage ū kūlīla kwane; ūtalembeelage dūhū alīyo nakūlīlaga shisoji. Nguno ū nene nalī ngeni ū kūlī bebe, nalī mīti gīt'ūmo baalī a bakūlūgenji bane.

¹³Nilekage ooye ū kūnidonhoka, nane nayege ho, kūko nataalī kwīnga natizūbiza ho hangī.”