Read Sukuma Bible 2015 – Bibilia Ilagano Lya Kale 2015 Zabuli 40 Bible Online

Zabuli 40 - Sukuma Bible 2015 – Bibilia Ilagano Lya Kale 2015 bible

Zabuli 40

¹Kūlwa ntongeeji wa bīmbi. Zabuli ya ng'wa Daūdi. Naanindīīlile no ū SEEBA mu būlembeezu, nose waniigwile winama kūnidegeleka ū kūlīla kwane.

²Ūnifunya ū ng'wichongo lya būnhyūūlūlū, ūnīnja mu tembe na lūdeepu, ūnikīndīka ha shiganga, nīmīīla na mhambala jane, hūna ūniguzūhya ū mu kashimīzīle kane.

³Ūtūūla lyīmbo ipya ū mu nomo gwane, lyīmbo lya kūngongoola Mulungu wise. Bingī bakūbona bogohe, hama bansanye ū SEEBA.

⁴Alī na ū munhū ūyo ansanije SEEBA, ūyo atabalondeelaga bikumīlīja, a banhū abo bakatalaga bayūlondeela bamulungu ba kwigīmbīja.

⁵Ee SEEBA Mulungu wane, Ī shakūkumya īsho wītile shilī shingī no. Īyo wīhelile kūlwa nguno yise atīho wa kūdūla kwīhaya ū kū būtongi wako; ūlū nihamba kūshihooyela na kūshiyomba, shikūbiza shingī no, shitī na būbalīle.

⁶Shitambò na shakwinha, walī ūtī na ng'hūmbū nasho; alīyo ū nene waninhile shiigwa matū. Walī ūtagongile shitambò sha kūpemvwa, nūūlū shakwinha īsho shikafunyiagwa kūlwa shibi.

⁷H'ī nguno yene nakahaya gīkī, “Lolaga ū nene nalīho, nizile; ū mu shandīkwa handīkilwe kūlwa nguno yane;

⁸Nalī na būyegi ū kwīta īyo ūtogilwe, Ee Mulungu wane; a malange gako galī mu ng'holò yane.”

⁹Ū būtūngīlīja naabūlomeelile kwibità itaale; ū nomo gwane nataalī ū kūgūhuumūja, gīt'ūmo ūmanīlile, Ee SEEBA.

¹⁰Ū būtūngīlīja wako nataalī kūbūbisa mu ng'holò yane, ū būsanyiwa wako naabūkumūkije pyī nū būpīji wako. Ū būtogwa wako ūbo būtashilaga, nī ng'hana yako, nataalī kūshibisa ū kū mabità a mataale.

¹¹Ee SEEBA, ūtizūnīngīja ī shigongo shako, ū būtogwa wako ūbo būtashilaga, nī ng'hana yako, ni shinilang'hanage shikū jose.

¹²Nguno makoye mingī no, gatī na būbalīle ganipīndije; ī shibi shane shanibipije, nose nalīlemeelwa ū kūbona. Shilī shingi no kūtinda nī nzwīlī ja kū ntwe gwane. Ī haha ī ng'holò yalebaga ū mu gatī yane.

¹³Ni gūkūyejage, Ee SEEBA, ū gwa kūnipīja; Ee SEEBA, nangūhīlage ūnigune.

¹⁴Bose pye abo bakūkoobaga kūnīngīja būpanga, bading'we minala na bazwangane; bose abo bakūyegaga ūlū napandīka makoye bashoshiwe kū numa, na bagooke.

¹⁵Abo bakūnanīīlaga būhaya, “Būl'obona!” Būlī! Obona! Bagooke na babbūūlīhe.

¹⁶Alīyo basangabale pye abo bakūkūkoobaga, na bayegele mulī bebe; bose abo babūtogilwe ū būpīji wako būlī lūshikū bahaye, “Ū SEEBA akūjiwe!”

¹⁷Ū nene ng'wene nalī ng'habī na ngayiwa, ū Seeba ni aniiganikīlage. Ū Bebe hū ūlī ngunanhi wane na mpīja wane, ūtizūdīīla, Ee Mulungu wane.