Read Sukuma Bible 2015 – Bibilia Ilagano Lya Kale 2015 Zabuli 45 Bible Online

Zabuli 45 - Sukuma Bible 2015 – Bibilia Ilagano Lya Kale 2015 bible

Zabuli 45

¹Kūlwa ntongeeji wa bīmbi; ng'wilaka lya, Būlabo. Lyīmbo lya bitogwi, lya bitūnja ba ng'wa Koola. Ī ng'holò yane yokalaga būyegi pa, yūseesekela kūlwa maganiko masoga; nakūng'wīmbīla lyīmbo ū ntemi, ī haha ū lūlīmi lwane lūlī gītī kalamu ya ng'wandīki nkalaganu.

²Ū mu banhū bose ū bebe ūlī wawiza no, nū nomo gwako gookalile wiza būtaale, h'ī chene ūlī na ja welelo na welelo kūfuma kale.

³Bebe ngosha wa mbagashūūla, lītungage mu nkīmbīlī ī līlūshu lyako, zwalīlaga ikūjo na būdūla.

⁴Damhīlaga ūje mu būdūla wako ūkūgaadaga nyapyeni, kūlwa kwīlwīlīīla ī ng'hana nū widohya, nū būtūngīlīja; ū nkono gwako ū gwa būlyo gooleche mihayo ya kūkamaaja.

⁵A banishi ba ntemi balasage masonga gako mūgī galibīle mu ng'holò jabo; mahanga gagwe mu magūlū gako.

⁶Ī lisumbī lyako lya būtemi Mulungu, līl'isumbī lya welelo bose; nū nang'ha gwako go būtemi gūlī nang'ha gwa būtūngīlīja.

⁷Ee Mulungu, ū būtūngīlīja ūbūtogilwe, alīyo ū būshitiigwa ūbūkolilwe; h'ī nguno yene ū Mulungu wako wakūbilile maguta ga būyegi kūtinda a biyo.

⁸Pyī ī shizwalo shako shilī na ng'waso gwa ngazu īsangije būnasa būsoga,[9] kūfuma mu numba jizengilwe chiza kūlwa batemi, jūtūūlīlwa būlenji wa mapembe ga mhūlī; na malaka ga ndono ja bīmbi gakūhelelekejaga kūlwa kūkūyeja.

⁹Ū mu sī yako balīmo bakīma bakūjiwa, bamò babo bashīke ba batemi; ū kū nkono gwako gwa būlyo wīmīīlaga ū ngole, azwaalīlile būlenji bo zahabu ya kūfuma Ofili.

¹⁰Igwaga bebe munhya, iganikage chiza, tegaga ū gūtū gwako. Bīībage a banhū bang'wing'we, a ba numba ya ng'wa so.

¹¹Hūna ū ntemi akūbūyegela no ū wiza wako; nkūjage, nguno ū wei Seeba wako.

¹²Hūna a banhū ba Tulo bakūkūkooba, basabi bakwenha manong'ho gīkī ūbatogwe.

¹³Ū nshīke wa temi alī mu chumba shakwe akūlabangīlaga, azwalīlile shizwalo shakwe sh'ikūjo, sha būlenji wa zahabu.

¹⁴Akwenhwa ū kūlī ntemi azwalile shīzwalo sha mabala masoga masoga; ū kū būtongi wa ntemi akūshishiwa alī hamò na binhya biye, a bashindīkīji bakwe.

¹⁵Bakwenhwa bokalaga būyegi na kūsangabala, bakwingīlaga ū ng'wikūlū lya ntemi.

¹⁶Bitūnja bako bakwīma a ha ng'wanya gwa bakūlūgenji bako, ūkūbatūūla būsugi hose pyī ū mu sī.

¹⁷Ī lina lyako nakūlyīta lībize lyakwizūkwa mu shibyalīlwe shose būja na būja; hūna a mahanga gakūkūkumīlīja welelo bose.