Read Sukuma Bible 2015 – Bibilia Ilagano Lya Kale 2015 Zabuli 49 Bible Online

Zabuli 49 - Sukuma Bible 2015 – Bibilia Ilagano Lya Kale 2015 bible

Zabuli 49

¹Kūlwa ntongeeji wa bīmbi. Zabuli ya bitūnja ba ng'wa Koola. Īyigwagi īyī, bing'we banhū bose; bing'we bose a bikaji ba mu sī tegagi matū.

²Bose pye bado na bakūjiwa, pye pye pye basabi na bahabī.

³Ū nomo gwane gūkūyomba mihayo ya masala, nū kwideedeng'hanya kwane kūkūbiza mu witegeleja.

⁴Nakūgūtega ū gūtū gwane kū sumo; nakūlīfubola ifubo lyane mu mīmbo ga ndono.

⁵Nibūlī nogohe ū mu shiku ja būbi, ū ng'wikanza lya kūpīndiwa na biboneeji babūbi,

⁶banhū abo basendamīlile būsabi wabo, na bakikūmīlījaga kūlwa wingī wa sabo jabo?

⁷Atīho munhū wa kūdūla kūnkomoola ndūgūye, nūūlū kūng'winha ū Mulungu shikomoolelo sha būpanga wakwe.

⁸Nguno ī shikomoolelo sha būpanga shilī na mpango ntaale no; shitīho shilīpīlo sha kwigela nūūlū hado,

⁹gīkī ikale mpanga welelo bose, atizūja mu shigila.

¹⁰Alichene, bose pyī tūkabona gīkī na a ba bamasala bakachaaga, babize bachilū nūūlū bihimangīja, pye balī mu lūkwa lūmò; bakachaaga baleka sabo jabo jikūlyiagwa na bangī.

¹¹Ī shigila h'ī kaya jabo ilalī, bakūbiza ng'wenūmo shibyalīlwe sha būja na būja, nūūlū bakabiza baalī badimile sī nhaale na kinehe, būjitana na mu mina gabo boi benekīlī.

¹²Ū munhū atīko kwikala mpanga kūlwa kūkwīja sabo, nang'hwe akachaaga ūmo jikachīlaga shiinū.

¹³Yīyī īyo īkabagwīlaga abo basanije ya būchilū, nī ng'halīlo ya babo bakizunīlījaga nabo:

¹⁴Batikīlile na ng'holo, bahelelilwe gwa kūja mu shigila; ī licha līkūbalya. A batūngīlīja bakūbasuga mu dilū; ī mībīlī yabo īkūbolela mu shigila, mu shimu, ū mu wikalo wabo.

¹⁵Alīyo ū Mulungu akūbūkomoola ū būpanga wane kūfuma ū mu nguzu ja shigila, nguno akūnanukūla kū wikalo wakwe.

¹⁶Ūtizogoha ūlū munhū ūsaba, ūlū ūbona habiza n'ikūjo a ha ng'wakwe.

¹⁷Nguno ūlū ūcha atīko kūjaana shose shose, Ī likūjo lyakwe atika hamò nalyo līkūnondeelaga.

¹⁸Nūūlū akamanibona gīkī afuuhilwe ū mu shikū ja būpanga bokwe, nūūlū bayūnkumīlīja a banhū īkī wasabile,

¹⁹nahene akūja dūhū kū shibyalīlwe sha bakūlūgenji bakwe, abo nabo batalalībona ī lisana lya būpanga.

²⁰Ū munhū h'ūmo agūngūhīle, ūlū atī na witegeleja, alīi gītī shiinū ījo jikachaaga jajimīīla.