Read Sukuma Bible 2015 – Bibilia Ilagano Lya Kale 2015 Zabuli 5 Bible Online

Zabuli 5 - Sukuma Bible 2015 – Bibilia Ilagano Lya Kale 2015 bible

Zabuli 5

¹Kūlwa ntongeeji wa bīmbi. Zabuli ya ng'wa Daūdi, ya kwīmvwa kūnū mbiilūlū jikūfuulagwa. Ee SEEBA, īdegelekage ī mihayo yane, nidīlīlage ū mu kūgang'hīla kwane.

²Ee Ntemi wane, na Mulungu wane, liigwage ī lilaka lya kūlīla kwane, nguno nalīkūlomba bebe.

³Ee SEEBA, būlī lūshikū ī dilū ūkaniigwaga ū mu kūlīla kwane, būlī dilū nakakūhelelaga ū kūlomba kwane, hūna nalindīīla mu kwisagīlwa.

⁴Nguno ū bebe ūtī Mulungu wa kūyejiwa būbi, ū būbi būtīko kwikala hamò nang'ho.

⁵A bikumīlīja batīko kwīmīīla kū būtongi wako, bose pye abo bakīītaga yabūbi ūbakolilwe.

⁶A balomolomo ūkabakenaagūlaga, ū SEEBA atabatogagwa a babūlagi na a bamaama.

⁷Alīyo kūlwa wingī wa shigongo shako, ū nene nakwingīla ū mu numba yako; nakūkūlamya mu logohano nalī kū hekalu yako.

⁸Ee SEEBA, kūlwa nguno ya banishi bane nitongeelage mu būtūngīlīja wako, nigoloolelage ī nzīla yako.

⁹Ū mu yose īyo īkafumaga mu milomo yabo, gūtīho nūūlū gūmò ū gwa kūsanyiwa; ū mu ng'holò jabo bookalile būkenaagūji. Ī limilīlo lyabo līlī shigila shikundūkile; ī ndīmi jabo bakajitūmamīlaga kūlemba lemba.

¹⁰Ee Mulungu, bagwisījage nsango! Ī nyasala sala yabo ībagwashe boi benekīlī. Baponyage kūlwa shibi shabo shingī, nguno bakūgomelile ū bebe.

¹¹Alīyo ni bayegage pye abo bakabūngīlàga mulī bebe, ni bīmbage na būyegi shikū jose. Bafīkījage ūbalang'hane, abo balītogilwe ī lina lyako bayegele mulī bebe.

¹²Nguno Ee SEEBA, a batūngīlīja ūkabīīlūkīlaga mbango; ūkabafīkījaga na shigongo shako gītī kūtūmamīla lūmūda.