Read Sukuma Bible 2015 – Bibilia Ilagano Lya Kale 2015 Zabuli 52 Bible Online

Zabuli 52 - Sukuma Bible 2015 – Bibilia Ilagano Lya Kale 2015 bible

Zabuli 52

¹Kūlwa ntongeeji wa bīmbi. Lyīmbo lya ng'wa Daūdi aho Doegi muna Edomu akaja kūlī Saulo; ūūkang'wīla, ū Daūdi walī wizile a ha ng'wa Ahimeleki. Nibūlī ūkwikumīlījaga bebe munhū wa nguzu, ni kihene ūkwikumīlījaga mu būbi ūbo ūkūwītaga būlī lūshikū kūlwa kwilwisha nū wiza bo ng'wa Mulungu?

²Ūlī koolī mu kūbeeja long'we ja būkenaagūji, ū lūlīmi lwako lūkikalaga lūnoolile gītī lūgembe, lūmanīīlile kūhela ya būmaama.

³Ū būbi ūbūtogilwe kūtinda wiza, nū būlomolomo kūtinda kūhaya ya ng'hana.

⁴Ee lūlīmi lūmaama, būlī mhayo gwa kūminya banhū ūgūtogilwe.

⁵Alīyo ū Mulungu akūkūkenaagūla ilalī, akūkūhaja akūhulumūle ū ng'wiheema lyako, akūkūdubbūla akwīnje ū mu sī ya bapanga.

⁶Abatūngīlīja bakūbona bogohe, hama bakūseka balīhaya,

⁷“Mulīmona ū munhū ng'wenūyū, walī atatogilwe ū Mulungu abize nguzu jakwe, walī asendamīlile wingī wa sabo jakwe, wapandīkaga nguzu kūfuma mu wiboneeji bokwe.”

⁸Alīyo ū nene nalī gītī nzeituni ūyo gūfulumile mu numba ya ng'wa Mulungu, shikū jose nasanije būtogwa bo ng'wa Mulungu, ūbo būtashilaga.

⁹Nakūkūkumīlīja shikū ja welelo bose, nguno hū bebe wagwītile ū gwenūyū, ī lina lyako h'īlo nakūliisagīlwa, nguno līlī liza no. Nakūkūkumīlīja kū būtongi wa beela bako.