Read Sukuma Bible 2015 – Bibilia Ilagano Lya Kale 2015 Zabuli 54 Bible Online

Zabuli 54 - Sukuma Bible 2015 – Bibilia Ilagano Lya Kale 2015 bible

Zabuli 54

¹Kūlwa ntongeeji wa bīmbi. Lyīmbo lya ng'wa Daūdi, lya kwīmvwa ndono jikūtūlagwa. Aho bana Zifu bakaja kūlī Saulo būūkahaya, ū Daūdi alī mu bise ibisile. Ee Mulungu, nipījage kūlwa lina lyako; nī ng'hana yane yoolechage kūlwa būdūla wako.

²Ee Mulungu, kwigwage ū kūlomba kwane; tegaga ū gūtū gwako wigwe ī mihayo ya kūfuma mu nomo gwane.

³Nguno bibonya baanūūbūkīlile, banhū abo batī na shigongo, hangī batī n'ikūjo kūlī Mulungu, h'abo balībūkooba ū būpanga bone.

⁴Alīyo ū nguni wane ū nene alī Mulungu, ū Seeba hū nang'hani wa būpanga wane.

⁵H'ūyo akūbalīpa ī yabūbi a banishi bane; ū mu būsanyiwa wako bamalage pye a bose.

⁶Nakūkūfunīja shitambò sha wiyaabī; Ee SEEBA, nakūlīkumīlīja ī lina lyako, īkī līlī lyawiza.

⁷Nguno bebe wanipīgije ū mu makoye gane gose, Ī liso lyane lyabiloleelile a banishi bane balīpyenwa.