Read Sukuma Bible 2015 – Bibilia Ilagano Lya Kale 2015 Zabuli 55 Bible Online

Zabuli 55 - Sukuma Bible 2015 – Bibilia Ilagano Lya Kale 2015 bible

Zabuli 55

¹Kūlwa ntongeeji wa bīmbi. Lyīmbo lya ng'wa Daūdi, lya kwīmvwa na ndono jikūtūlagwa. Ee Mulungu, kūdegelekage ū kūlomba kwane, yaya ū kūkūdalaha ū kwikūmbīlīja kwane.

²Niigwage ūnishokeje; nguno nalīkoya no ū mu maganiko, nose naazwanganile,

³kūlwa nguno ya yoge ja banishi, kūlwa wiboneeji wa bahūnga. Nguno balīnikoya, nīyo bakwikalaga būnisīīga kūlwa kūnikolwa.

⁴Ū mu gatī yane ī ng'holò yane īlīkoya no, naanogile no ū kwikala nogohaga icha.

⁵Booba na kūdetema shilīniminya, ū boobà wanimagije ī mhola.

⁶Nose nalīyiwīla iyene gīkī, “Gīt'ūlū ni nabange g'hūūlū ya manana, ni naalala kūja kūle, nakifuule.

⁷Na ng'hana, ni nasegenela; ū wikalo wane ni nashosha kū matogolo.

⁸Ni nīnga wangū, naje nakūkoobaga ipandī lya kūbūngīlà, nagūpeele ū nyaga ū ntaale nī kashūlūūdū.”

⁹Ee Seeba, bazwanjage ū mu kahelele kabo, jiliganyage ī ndīmi jabo; nguno nalībona wiboneeji na wilemeelwa ū mu nzengo.

¹⁰Līīmi ji na būjikū pe bakūkūngīlaga, būlīmo būbi būtaale, na būkenaagūji wingī.

¹¹Nguzu ja būkenaagūji jikūtūmamaga moi; wiboneeji na būnyeecha shitīngaga ū mu nzīla jaamo.

¹²Ūyo akūnidalahaga atī ng'wanishi wane, ūlū ni chene ni niyūmīlīja; nūūlū atī ng'wikenya wane ūyo alīnibengeleja; ūlū ni gīko ni nang'wīngīla.

¹³Alīyo ūlī bebe, munhū gīt'ūmo nalī ū nene, ng'wichane na nwani ng'wichane wa shikū jose.

¹⁴Twalī na būsangī būsoga bo kūhooya mu būmò chiza chiza; nū mu numba ya ng'wa Mulungu twashimīzaga dege mu būsangī.

¹⁵Leka lībagwīle icha biike kūja kūlimu balī bapanga gīko, nguno ū mu ng'hambī jabo būlīmo būbi, ūbo būkwikalaga hamò nabo.

¹⁶Alīyo ū nene nakūng'witana Mulungu, nang'hwe ū SEEBA akūnipīja.

¹⁷Būlī mhīndī nī dilū, pyī nī līīmi, nakanīlīīlaga mu kwiyanda; nang'hwe waliigwa ī lilaka lyane.

¹⁸Akanipījaga, ū būpanga bone bobiza mhola; nū mu būūbūkīlwa bone akanījaga, nūūlū īkī balī bingī a bilwisha bane.

¹⁹Ū Mulungu ū Ntemi wa welelo bose, akwigwa abagwisīje mayanga; nguno batatogilwe ū kūgalūka bīnge ū mu nhūngwa jabo; nū wei ū Mulungu batang'ogohile.

²⁰Ū ng'wichane wabūūbūkīlile a banwani biye, wabūkenaagūlile ū būlagane wakwe.

²¹Walūtūmamīlaga kalūngalūngīle kalyehu kūtinda mashishanga; alīyo gashi ū mu ng'holò yakwe būlīmo būlūgū. Ī mihayo yakwe yalī mifuuku kūtinda maguta, alīyo yalī myūgī gītī lūshū.

²²Ntūūlīlage SEEBA ū kūtawa tawa kwako, nang'hwe akūkūhandatīja; atīko kūnekanīja ntūngīlīja agwe.

²³Ee Mulungu, ū bebe ūkūbaponya ng'wichongo lya būkenaagūji; a babūlagi na a banyeecha batikala bapanga, batūshika nūūlū ha nusu ya myaka ya būlamu wabo. Alīyo ū nene nakūsanije bebe.