Read Sukuma Bible 2015 – Bibilia Ilagano Lya Kale 2015 Zabuli 56 Bible Online

Zabuli 56 - Sukuma Bible 2015 – Bibilia Ilagano Lya Kale 2015 bible

Zabuli 56

¹Kūlwa ntongeeji wa bīmbi. Ng'wilaka lya, ng'hūūlū īlī kūle kū mitī. Lyīmbo lya ng'wa Daūdi, aho Bafilisiti baalī bampiganīja ipandī lya Gaasi. Ee Mulungu, nichīlage shigongo, nguno banhū bakūnikūūbīlījaga; līīmi tole bakūnihīīgaga.

²A banishi bane bakūnikūūbīlījaga līīmi ji, bingī no abo bakūnūūbūkīlaga mu wibonya wabo.

³Ūlū nalī ng'wikanza lya kūkoyiwa boobà, nakūkwisagilwa bebe.

⁴Ū Mulungu ūyo mhayo gwakwe nakagūkumīlijaga, hū ng'wene ū Mulungu ūyo nansanije; nose natī na sha kogoha. Ū munhū wa mīlī akūnīīta kī?

⁵Līīmi ji bakikalaga bīchaamya ī mihayo yane, bakikalaga būnilīīla gwīnda ya kūnīītīla mibi.

⁶Bakibilingaga hūna baayūnikūngīla, baaja balīlola ūmo japandaga ī mhambala jane, nguno ī ng'hūmbū jabo jilī gīkī banibūlage.

⁷Ūtizūbaleka nūūlū hado bakapūlūgūka; Ee Mulungu, ū mu būpelanu wako gagwishage a mahanga ga banhū.

⁸Ū bebe ūmanile ūmo nakūyugagūlīlagwa, Ī shisoji shane shisūmbyage ūshitūūle mu shisaabo shako. Shitīmo gete ū mu shitabo shako?

⁹Ūlū nūkūlīlīīla gīkī ūnigune, a banishi bane bakūpeela nhambo; ū mhayo gwenūyū nagwitegelegije, nguno ū Mulungu alī hamò nane.

¹⁰Ū Mulungu ūyo mhayo gwakwe nakagūkumīlījaga, ū SEEBA ūyo mhayo gwakwe nakagūkumīlījaga;

¹¹hū ng'wene ū Mulungu ūyo nansanije; nose natī na sha kogoha. Ū munhū wa mīlī akūnīīta kī?

¹²Ee Mulungu, ī shilahīlo shane ū kūlī bebe, Īnigeleelilwe nashishikīlīje; nakūkūfunīja shitambò sha kūlūmba.

¹³Nguno wabūpīgije ū būpanga wane mu kūcha, nī mhambala jane ūjihandīkīīja natizūgwa; nadūle kūshimīza kū būtongi bo ng'wa Mulungu nalī ng'wisana lya būpanga.