Read Sukuma Bible 2015 – Bibilia Ilagano Lya Kale 2015 Zabuli 57 Bible Online

Zabuli 57 - Sukuma Bible 2015 – Bibilia Ilagano Lya Kale 2015 bible

Zabuli 57

¹Kūlwa ntongeeji wa bīmbi. Lyīmbo lya ng'wa Daūdi aho wantolokaga Sauli ūkibisa ng'wipilinga. Ng'wilaka lya, Ūtizūkenaagūla. Ee Mulungu, nichīlage shigongo, nichīlange shigongo; nguno ū būpanga bone būkapīlīlaga mulī bebe. Nakūbūngīlà mu mbeho ya manana gako, kūshisha ī miyaga ya būkenaagūji ībīte.

²Nalīnīlīīla Mulungu ūyo alī Higūlya no, Mulungu ūyo akīshikīlījaga īyo anihelelile.

³Akūlagīja kūfuma ng'wigūlū anipīje, akūbahama abo bakūnikūūbīlījaga; ū Mulungu akūnitūmīla ya koolecha būtogwa wakwe na ng'hana yakwe.

⁴Ū būpanga wane būnyamanījiwe ha gatī ya mashimba, nakīngilwe mashiinū malaku, malya banhū; ga mino mūūgī gītī machimu na masonga, nī ndīmi jago jitikīlile na shū nyūūgī.

⁵Ee Mulungu, ūgūngūhiwe higūlya no, kūkīla mapandī g'igūlū; ī līkūjo lyako lībize higūlya ya sī jose.

⁶Ūmo nakūbītaga banitegile lūbeto, nose ū būpanga bone wagung'humile. Baalī baasīmbile ichongo ū mu nzīla yane, alīyo baagwīlile mo boyi benekīlī.

⁷Ee Mulungu, ī ng'holò yane īhandatīlile, Ī ng'holò yane īhandatīlile no; nakwīmba na kūkumīlīja.

⁸Mishaga būpanga wane! Mishagi bing'we ndono na malimba! Nakūlīmisha ī likīngo.

⁹Ee Seeba, nakūkūlūmba mu banhū bingī, nakūkūgongoola ha gatī ya mahanga.

¹⁰Nguno ū būtogwa wako būlī būtaale no būkagije kwigūlū, ū būsanyiwa wako būshikile kū malunde.

¹¹Ūgūngūhiwe higūlya no, Ee Mulungu, kūkīla mapandī g'igūlū; ī līkūjo lyako lībize higūlya ya sī jose.