Read Sukuma Bible 2015 – Bibilia Ilagano Lya Kale 2015 Zabuli 58 Bible Online

Zabuli 58 - Sukuma Bible 2015 – Bibilia Ilagano Lya Kale 2015 bible

Zabuli 58

¹Kūlwa ntongeeji wa bīmbi. Lyīmbo lya ng'wa Daūdi. Ng'wilaka lya, Ūtizūkenaagūla. Bing'we basugi,[11] mukūtūngīlījaga gete ū mu kalūngalūngīle? Mūkūbalamulaga a banhū mu būtūngīlīja?

²Na hado yaya, nguno mulī na maganiko mabi no ū mu ng'holò jing'we; na a makono ging'we gakīītaga mingī no Ī ya wiboneeji ū mu sī.

³A bahūnga bene babūbi dūhū, nūūlū aho bataalī mu nda, kūfuma kūbyalwa kwabo bahūbīkile; gwabo kūyomba būlomolomo.

⁴Ī mihayo yabo īlī gītī būsūngū wa nzoka; batikīlile na nhaagabūganga īyo ītigwaga bahami,

⁵Īyo ītigwaga malaka ga bagòta, h'ūmo akwīgīje maleeba ū ngòta.

⁶Ee Mulungu, babīnzagūjage a mino ū mu milomo yabo, Ee SEEBA, gahomagūlage a mahwīmīlo ga shimba ī songi.

⁷Ni bashilage gītī minzī gakūhūūmaga gajile, ūlū baaduta būta gīkī balase, a masonga gabo gayūfuuja.

⁸Babize gītī ngooku ūmo jikachīlaga jaaba, lyasaaga inonga dūhū, bajimīīle, baleke ū kūlībona ī līīmi; babize gītī nda ya kūfunda fundwa.

⁹Ū būsebu wa moto gwa masanzu madoto nūūlū mūūmu, aho būtaalī kūjipandīka ī nengelo jing'we, a ba malofu bakūsangwa bapyagūlagwa būshila!

¹⁰A batūngīlīja bakūyega no ū kūbona kūmalwa kwa shiilī, hūna ī mhambala jabo bakūjooja mu mininga ga bahūnga.

¹¹A banhū bakūhaya, “Ng'hana a batūngīlīja balī na mheela; na ng'hana ū Mulungu hū ng'wene ū namuji wayo ī sī.”