Read Sukuma Bible 2015 – Bibilia Ilagano Lya Kale 2015 Zabuli 59 Bible Online

Zabuli 59 - Sukuma Bible 2015 – Bibilia Ilagano Lya Kale 2015 bible

Zabuli 59

¹Kūlwa ntongeeji wa bīmbi. Lyīmbo lya ng'wa Daūdi; ng'wilaka lya, Ūtizūkenaagūla. Aho Sauli akatūma banhū kūja kwīlola kaya ya ng'wa Daūdi, gīkī bamūlage. Ee Mulungu wane, nipījage ū kū banishi bane, nilang'hanage ū kū banhū abo bakūnidumīlaga.

²Nipījage ū kū bīīti ba mihayo yabūbi, nīnjage ū mu makono ga babūlagi.

³Nguno bakūniibandīīlaga kūkooba kūnibūlaga; Ee SEEBA, banhū bapelanile bakwikobyaga kūnihelela mibi; alīyo natī na shibi nūūlū nataalī kūbakenya mhayo gose gose.

⁴Bakwiyaalīlījaga bo nhambo gīkī bize kūnidumīla, nūūlū aho natī na būbi. Būkaga, ūgalole a makoye gane, ūnigune!

⁵Ee SEEBA, Mulungu wa būdūla bose, Mulungu wa Isilaeli, mishaga, ūgagwisīje nsango pye a mahanga; ūtizūbachīla shigongo, bijomboki babūbi no.

⁶Būlī lūshikū ī mhīndī bakizaga baayūhooyoka gītī mawa, kūnū bakūgūpīndīīlaga ū nzengo.

⁷Bakūmanūbbīzūka kūfuma ū mu milomo yabo; ū kūfuma ū mu milomo yabo bakabbīzūkaga mihayo myūgī no gītī shū; baakūyūhaya, “Nani akūtwigwa?”

⁸Alīyo ū bebe, Ee SEEBA, ūkabasekaga; ūbadalahile pye a banhū ba mahanga.

⁹Ee bebe Nguzu jane, nakūsendamīlile bebe, Ee Mulungu, ū bebe hū ūlī ngītīli yane.

¹⁰Ū Mulungu akūniguna kūlwa būtogwa wakwe; ū Mulungu wane akūbiza kū būtongi wane, anoolekeje ū kūpyenwa kwa banishi bane.

¹¹Kwike Ee Seeba, bebe ūyo ūlī Lūmūda lwise, ūtizūbabūlaga; nguno a banhū bane bakwība. Alīyo ū mu būdūla wako, bīītage babize baakūja bakūlūba lūbaga ūko na ūko, hanuma ya henaho ūbadoheleje bagooke.

¹²Kūlwa shibi sha milomo yabo, Ī mihayo īyo bakīhayaga na milomo yabo, ni bigwashage boi benekīlī kūlwa wikumīlīja wabo. Bakikalaga bakūhayaga mihayo ya mazumo na būlomolomo,

¹³bamalage kūlwa būpelanu wako, ūbayagaje pye a bose gete bakalīke; hū gūkūmanīka pye a hose ū mu sī gīkī ū Mulungu alī nsugibo ng'wa Yakobo.

¹⁴Ī mhīndī bakashokaga balīng'ang'aala gītī mawa, kūnū bakūkūnga kūngīlaga ū mu nzengo.

¹⁵Bakūlūba lūbaga kūja būkooba shilīwa, ūlū shabileba bandya kūng'ang'aala gītī mawa.

¹⁶Alīyo ū nene nakwīmba ya būdūla wako; Ī dilū makīngo nakwīmba ya būtogwa wako, nguno ū bebe ūlī būpīlīlo wane, ibūngīlò lyane ng'wikanza lya makoye.

¹⁷Ee Nguzu jane, nakwīmba mu kūkūgongoola, nguno ū bebe Ee Mulungu, ūlī būpīlīlo wane, Mulungu ūyo anitogilwe.