Read Sukuma Bible 2015 – Bibilia Ilagano Lya Kale 2015 Zabuli 6 Bible Online

Zabuli 6 - Sukuma Bible 2015 – Bibilia Ilagano Lya Kale 2015 bible

Zabuli 6

¹Kūlwa ntongeeji wa bīmbi. Zabuli ya ng'wa Daūdi ya kwīmvwa kūnū ndono jikūtūlūgwa, ng'wilaka lya Sheminisi. Ee SEEBA, ūtizūnihama mu būkalī wako, nūūlū ūtizūnihūgūla mu būpelanu wako.

²Ee SEEBA, nichīlage shigongo, nguno nalongeja kūshila; Ee SEEBA, nipījage, a maguha gane galīkoya no.

³Ū būpanga bone būlīluha no, nakwikala gīkī kūshisha nanalī, Ee SEEBA, kūshisha nanalī?

⁴Ee SEEBA, nigalūkīlage ūnipīje, nipījage kūlwa būtogwa wako ūbo būtashilaga.

⁵Nguno atīho wa kūkwizūkwa ūlū achile, nani akūkūkumīlīja ūlū alī mu kū limu.

⁶Nose naasedeekile kūlwa kūlīla; būjikū pe nakūhūūmyaga shisoji ha ndīlī, kūshisha ū būlīīlī bone būkūlobaga.

⁷Nose a miso gane gaamalile ī nguzu kūlwa nguno ya būpīna, gaasedeekile nguno ya banishi bane.

⁸Bing'we pye abo mukīītaga yabūbi, nīngīlagi ū nene; nguno ū SEEBA waliigwile ī lilaka lya kūlīla kwane.

⁹Ū SEEBA wakwigwile ū kwikūmbīlīja kwane, ū kūlomba kwane wakwanukūlile ū SEEBA.

¹⁰Pye a banishi bane bakūgooka, hangī bakūzwangana no, bakūshoka kū numa wangū bachile soni.