Read Sukuma Bible 2015 – Bibilia Ilagano Lya Kale 2015 Zabuli 61 Bible Online

Zabuli 61 - Sukuma Bible 2015 – Bibilia Ilagano Lya Kale 2015 bible

Zabuli 61

¹Kūlwa ntongeeji wa bīmbi. Zabuli ya ng'wa Daūdi ya kwīmvwa na ndono jikūtūlagwa. Ee Mulungu, kwigwage ū kūlīla kwane, kūdegelekage ū kūlomba kwane.

²Kūfuma kū ngelelo ya sī nalīkūlīlīīla bebe, nalīkūlīlīīla, ī ng'holò yane yamalile ī nguzu; nitongage ū kū shiganga ī shilīhu kūnikīla ū nene.

³Nguno ū bebe ūl'ibūngīlò lyane, ng'hambī ya kūpīlīla ng'wikanza lya kūdumīlwa na banishi.

⁴Nakwikala ū ng'wiheema lyako shikū jose, napīlīle mu mbeho ya manana gako.

⁵Ee Mulungu, wakwigwile ū kūlahīla kwane; waninhile wingīji wa banhū abo balyogohile ī lina lyako.

⁶Jongejage ī shikū ja būlamu wa ntemi, Ī myaka yakwe ībize ya shibyalilwe shingī.

⁷Abize ntemi wa welelo bose kū būtongi bo ng'wa Mulungu, lagījaga būtogwa wako na ng'hana yako shinang'hane.

⁸Hūna nakwīmba nalīgongoole ī lina lyako, nū kūlahīla kwane nakūkūshikīlīja būlī lūshikū.