Read Sukuma Bible 2015 – Bibilia Ilagano Lya Kale 2015 Zabuli 63 Bible Online

Zabuli 63 - Sukuma Bible 2015 – Bibilia Ilagano Lya Kale 2015 bible

Zabuli 63

¹Zabuli ya ng'wa Daūdi. Makanza gene alī ng'witogolo lya Yuda. Ee Mulungu, ūlī Mulungu wane, ū nene nakūkūkoobaga mu būkalalwa būtaale; ū būpanga wane būlī na notà kūlwa nguno yako, ū mīlī gwane gūlī na ng'hūmbū nang'ho no, gītī sī ng'halamuku yagaya minzī.

²Ū ng'wipandī lyako lyeela naakūbonile, nū būdūla wako nūbūbona, pyī nī likūjo lyako.

³Īkī ū būtogwa wako būlī wawiza kūtinda būpanga, ū nomo gwane gūkūkūkumīlīja.

⁴Nakūkūlūmba shikū jose ja būpanga wane, nakūgabūūcha ng'wigūlya a makono gane kūlīkumīlīja ī lina lyako.

⁵Ū būpanga wane būkwigūta, gītī kwigūta shizeeze; ū nomo gwane gūkūkūgongoola mu mīmbo ga būyegi.

⁶Nakakwizūkagwa nūūlū nalī mu būlīīlī, Nakakwideedeng'hanyaga būjikū pe.

⁷Ū bebe īkī ūlī ngunanhi wane, h'ī chene nakīmbaga na būyegi ū mu mbeho ya manana gako.

⁸Ū būpanga wane būdimanile nang'ho, ū nkono gwako gwa būlyo gūnilang'hanile.

⁹Alīyo abo bakūkoobaga kūbūyagaja ū būpanga wane, bakūcha bajimīīlīle mu gatī ya sī.

¹⁰Bakūbūlagwa bo līlūshū lyūgī, bakūbiza shilīwa sha jidīvī.

¹¹Alīyo ū Ntemi akūnyegela Mulungu, bose pye abo bakalahīlaga mu lina lyakwe bakūkumīlīja na būyegi. Alīyo ī milomo ya balomolomo īkūhuumūjiwa.