Read Sukuma Bible 2015 – Bibilia Ilagano Lya Kale 2015 Zabuli 64 Bible Online

Zabuli 64 - Sukuma Bible 2015 – Bibilia Ilagano Lya Kale 2015 bible

Zabuli 64

¹Kūlwa ntongeeji wa bīmbi. Zabuli ya ng'wa Daūdi. Ee Mulungu, liigwage ī lilaka lyane ū ng'wikanza lya kūdaaya kwane, ūbūlang'hane ū būpanga wane; nalībogoha banishi bane.

²Nibisage ū kū wijomboki wa banhū babūbi, nagwīngīle ū nsambo gw'ibità lya bahūnga,

³abo bakikalaga banoolile ndīmi gītī shū, nī mihayo yabo myūūgī gītī masonga.

⁴Bakabibandīīlaga abo batī na shilingo, baayūbalasa mu mbisīla; bakabalasaga mu kūbifumbūkīja, nīyo batī na boobà nūūlū hado.

⁵Bakitimbyaga ng'holò mu kahelele ka mihayo yabūbi, kūnū būlomana nzīla ja kūbisa mitego yabo, bakwiwīlaga gīkī, “Nani akwībona?”

⁶Aho balī bakūlomanaga nzīla ja kūbeeja mibi, kūnū bakwiwīlaga gīkī, “Ū gwenūyū twahela gūpile!” Ū munhū alī na wibeeleleja būbi no, ū mu maganiko nū mu ng'holò yakwe!

⁷Alīyo ū Mulungu akūbalasa masonga, bakwisanganījiwa mihayo ya kūbagulaja.

⁸Akūbalwisanya bilemeelwe ū mu ndīmi jabo, bakenaagūke mu gīko; hūna pye abo balababone bakūyūshingisha mitwe bakūbasekaga.

⁹Ū mu gīko pye a banhū bakogoha; bakwīkumūcha ī milīmo ya ng'wa Mulungu, na kwīyideedeng'hanya īyo wīyītile.

¹⁰A batūngīlīja ni bayegelage mulī SEEBA, na babūngīle mulī we; pye a ba nhūngwa jigoloolile bankumīlīje we.