Read Sukuma Bible 2015 – Bibilia Ilagano Lya Kale 2015 Zabuli 69 Bible Online

Zabuli 69 - Sukuma Bible 2015 – Bibilia Ilagano Lya Kale 2015 bible

Zabuli 69

¹Kūlwa ntongeeji wa bīmbi; ng'wilaka lya, “Būlabo.” Zabuli ya ng'wa Daūdi. Ee Mulungu, nipījage, nguno a minzī galī mu nhingo.

²Naatīnije mu tembe, natī na ha kūtūūla nūūlū gūgūlū. Nalī mu minzī mingī, mu būjiba būshimu; mihūūmo īlī bbihī kūnimila.

³Nalīīlīla kūlwa kūkooba būgunwa, nose naasedeekaga, naagobaga ī lilaka; a miso gane gaamalaga ī nguzu, kūlwa kūdīīla nalolile nakwisagīlagwa kūmona Mulungu wane.

⁴Abo banipelanīlile na nguno ndūhū bingī no kūtinda nī nzwīlī ja kū ntwe gwane. A banishi ba kūnūūbūkīla mu kūnilembekeja gīkī baniyagaje balī na nguzu no. Nīyo nalīyūhadīkījiwa na kūshosha shikolo nūūlū natashisolile nene.

⁵Ee Mulungu, ūbūmanile ū būchilū wane; nū būkenaagūji wane būtibisile ū kūlī bebe.

⁶Ee Seeba, MULUNGU wa mabità, abo bakwisagīlilwe ūtīzūbaleka bakagooka kūlwa nguno yane; Ee Mulungu wa Isilaeli, abo bakūkūkoobaga batizūgwa mu būdalahwa kulwa nguno yane.

⁷Ū nene nakwiyūmīlījaga mu būdalahwa kūlwa nguno yako, na minala īnikundīkīgije ū būshū wane kūlwa nguno yako.

⁸Ū kū badūgū bane nalī gītī ngeni ī haha, nū kū baana ba ng'wa mayū gete nakūbalagwa gīkī nalī misa.

⁹Nguno būlīnilya ū wilu kūlwa numba yako, nī shidūki īsho ūkūdūkagūlagwa bebe shilīnigwīla nene.

¹⁰Aho naabūluhya ū būpanga wane, nūfunga nūyikala nakūlīlaga, nūbiza ndalahījiwa wa kwineenelegejiwa.

¹¹Aho naayūzwala shizwalo sha magūnīla, nahene nūbiza shiiloleelo kū banhū.

¹²Naabizile ng'hooyelwa no ū mu mabanza, pyī nū mu mang'wa walwa nakūlīngagwa.

¹³Alīyo Ee SEEBA, ū nene nalīkūlomba ng'wikanza īlo līzunīlījiwe; kūlwa būtogwa wako būtaale, Ee Mulungu, ninhage ishosho mu ng'hana ya būpīji wako.

¹⁴Nigunage ūnīnje ū mu tembe, ūtizūnileka nalibīle; nipījage ū kū banhū abo banikolilwe, nīnjage ū mu būjiba wa minzī mingī.

¹⁵Ūtizūnileka līkanijana ī lihūūma, nūūlū natizūmilwa būjiba būshimu, nūūlū natizūgwa ng'wichongo līkanihilimīkīla.

¹⁶Ee SEEBA, kūlwa wiza wa būtogwa wako niidīkage; ū mu wingī wa shigongo shako, nigalūkīlage.

¹⁷Ūtizibisa ū būshū wako ū kūlī nene ntūmami wako nguno nalī mu makoye, niidīkage wangū.

¹⁸Negeelage ūnikomoole, nipījage ū mu makono ga banishi bane,

¹⁹Ū Bebe ūkūmanile ū kūsondagūlwa kwane, nū kūgoolwa kwane, nū kūgayīlījiwa kwane, A banishi bane ūbamanile pye a bose ū bebe.

²⁰Ū būsondagūlwa wīminije ī ng'holò yane, nose namalaga ī nguzu; naalisagīlagwa kūpandīka wa kūnisaatwa, alīyo atigelaga, nūūlū balūngūja, nahene natūpandīkaga.

²¹Ī shīlīwa shane balīyūshisanja ndūlū, ūlū nakolwa notà bakūninhaga siki nang'we.

²²Ī shilīwa shabo ni shibizage lūtu, shibagwashe boi benekīlī; shibize mheela na ntego ū kūbo.

²³Na a miso gabo gabbokule batizūbona, nī migongo yabo bagung'humiwe ilalī!

²⁴Bahooleelage ū būdaki wako, ū būkalī wa būpelanu wako būbidīkīle.

²⁵Ū wikalo wabo būlekwe dalali, nīyo atizūzenga munhū ūngī ū mu maheema gabo.

²⁶Nguno bakabaluhyaga abo ūkabatūlaga bebe; hama kūlwa būsīīgani wabo, bakabongegejaga makoye abo ūkabaminyaga bebe.

²⁷Bongejage nsango a higūlya ya nsango gwabo, nū mu būtūngīlīja wako ūtizūbazunīlīja ū kūbiza mo.

²⁸A mina gabo ni gajimiagwe ū mu shitabo sha bapanga, nīyo batizandīkwa hamò na a batūngīlīja.

²⁹Alīyo ū nene nalī mu makoye ga kwiboneelwa, Ee Mulungu, ū būpīji wako ni būnilang'hanage.

³⁰Nakwīmba lyīmbo nalīgongoole ī lina lya ng'wa Mulungu, na nakūfunya shakwinha sha kūlūmba kūlwa kūnkūja we.

³¹Ū gwenūyū gūkūnyeja ū SEEBA, kūtinda nzīkū ya ng'ombe, nūūlū nzagamba ya chūūga na mhembe jayo.

³²Abo baluhile bakūbona bayege; bing'we abo mukankoobaga Mulungu, ī ng'holò jing'we ni jihīmbūkage.

³³Nguno ū SEEBA akabiigwaga a bagayiwa, hangī atabagumanījaga a banhū bakwe, abo balī mu būsese.

³⁴Ī ligūlū nī sī ni shinkumīlījage, na a manyanza nī shose īsho ng'anda ng'anda moi.

³⁵Nguno ū Mulungu akwīpīja ī Sayuni, nī mizengo ya Yuda akwīzenga hangī. Hanuma a banhū bakwe bakūzenga mo bīsuge.

³⁶Hūna a babyalwa ba batūmami bakwe bakūbiza bingīji bayo; nabo abo balītogilwe ī lina lyakwe, bakwikala mo.