Read Sukuma Bible 2015 – Bibilia Ilagano Lya Kale 2015 Zabuli 71 Bible Online

Zabuli 71 - Sukuma Bible 2015 – Bibilia Ilagano Lya Kale 2015 bible

Zabuli 71

¹Nalīpeelela kūlī bebe, Ee SEEBA; ūtizūnileka nakagooka nūūlū hado.

²Nigunage ūnikomoole kūlwa būtūngīlīja wako, gūgalūkījage kūlī nene ū gūtū gwako ūnipīje.

³Bizaga shiganga shane sha kūpīlīla, ipandī lya kūpeelela būlī gwa; funyaga shilagīlo sha kūnipīja, nguno ūlī shiganga shane n'ibūngīlò lyane.

⁴Nipījage, Ee Mulungu wane kūfuma mu nkono gwa munhū wabūbī, kūfuma mu nguzu ja banhū babūbi na biboneeji.

⁵Nguno ū bebe, Ee SEEBA Nsugi wa shose, ūlī kwisagīlwa kwane, nakūsanije kūfuma shikū ja walūki wane.

⁶Kūfuma kūbyalwa kwane nakūsendamīlile bebe; ūlī bebe ūyo ūkanīnja mu nda ya ng'wa mayū. Nakūkūkumīlīja makanza gose.

⁷Nguno ū kū bingī nalī gītī shidagū, alīyo ū bebe ūl'ibūngīlò lyane lya nguzu.

⁸Ū nomo gwane gookalile ya kūkūgongoola bebe, na ya kūlīhaya ikūjo lyako līīmi bbu!

⁹Yaya ū kūniponya ū mushikū ja būnamhala[14] wane, ūtizūnileka ī nguzu jane ūlū jūshila.

¹⁰Nguno a banishi bane bakūnisīīgaga, abo batogilwe kūnibūlaga bakūnilīīlaga gwīnda.

¹¹Bakwiwīlaga, “Ū Mulungu wanekile! Ndoolomyagi mundime, atīho wa kūmpīja!”

¹²Ee Mulungu, ūtizūnileka kūle, nangūhīlage, Ee Mulungu wane ūnigune.

¹³A babūūji bane babūlagwe magooke, abo bakūkoobaga kūnikenaagūla bagwīlwe būdalahwa n'ipondasoni.

¹⁴Kwike ū nene nakwikala mu kwisagīlwa shikū jose; nakongeja kūkūkumīlīja no no no.

¹⁵Līkūloka ū nomo gwane gūkūsomboolaga ya būtūngīlīja wako, nī ya shītīle shako ī sha kūpīja, nūūlū īkī natīmanile ū wingī wayo.

¹⁶Nakwiza mu būdūla bo ng'wa Seeba MULUNGU; nakūbūkumūcha ū būtūngīlīja wako, wako bebe iyene.

¹⁷Ee Mulungu, hū bebe ūlī nangi wane; kūfuma ha walūki bone kūshisha nī haha, nataalī nakūshikumūchaga ī shītīle shako Ī sha kūkumya.

¹⁸Ee Mulungu, yaya ū kūniponya, nūūlū nanamhaale jeele pe ī nzwīlī jane; kūshisha najisomboole ī nguzu jako kū shibyalīlwe īsho shiliza, bose pye abo balalondeele babūmane ū būdūla wako.

¹⁹Ū būtūngīlīja wako, Ee Mulungu, būlī kwigūlya no, kūshisha kū mapandī ga ng'wigūlū. Ee Mulungu, ū bebe ūkīītaga mitaale no, nani ū wa kūlenganījiwa na bebe?

²⁰Ū bebe hū wanolekegije makoye mingī na ga kūminya; ūkūbūhīmbūūcha hangī ū būpanga wane, ūkūnigūngūmūla hangī ūnīnje ī hasī, ū ng'wichongo ishimu.

²¹Ūkūnongegeja shingilima, na ūkūnilūngūja hangī.

²²Ee Mulungu wane, nakūkūgongoola na ndono; kūlwa būsanyiwa wako, Ee Ng'wela wa Isilaeli, nakūkwīmbīla mīmbo ga kūkūkumīlīja, kūnū nakūtūlaga malimba.

²³Ū nomo gwane gūkwīmba na būyegi ū ng'wikanza lya kūkūgongoola, ū nene nakwīmba n'ilaka lya higūlya; nene ng'wenūyū, ūyo wanikomoola

²⁴Ū lūlīmi lwane lūkūbūlomeela ū būtūngīlīja wako līīmi ji; nguno abo baalūkoobaga kūnikenaagūla, baagelelile kūzwangana na kūgooka.