Read Sukuma Bible 2015 – Bibilia Ilagano Lya Kale 2015 Zabuli 73 Bible Online

Zabuli 73 - Sukuma Bible 2015 – Bibilia Ilagano Lya Kale 2015 bible

Zabuli 73

¹Zabuli ya ng'wa Asafu. Ng'hana ū Mulungu alī wawiza ū kūlī Isilaeli, ū kū banhū abo balī beela mu ng'holò.

²Alīyo ū nene nakasaaja hado nachūūlūlūke, Ī mhambala jane jikasangwa jaheewa būnhyūlūlū.

³Nguno nakayūbabona a bibonya nabakalalwa, ūlū naabona ūmo bakūpandīkīlaga a bahūnga.

⁴A boi batatagambaga nūūlū hado; Ī mibīlī yabo mipanga jigi, hama bagīnu gwa.

⁵Batīmo ū mu makoye ayo gakabagwīlaga banhū bangī; īyo īkabaminyaga banhū bangī, a boi ītabakuumyaga.

⁶Nose a boi ū būdoshi babūzwalile gītī ngufu mu nhingo, ū wibonya h'ī shizwalo shabo.

⁷A miso gabo gabundugalile kūlwa būgīnu, Ī ng'holò jabo jokalile ya malofu.

⁸Badalahi, hama na a mahooya gabo mabi, ba kwikala bakwikumīlījaga na kūdūkana.

⁹Ī milomo yabo bīmanīlīgije kūsondagūla ya ng'wigūlū, ī ndīmi jabo ja kwikala jikūboolomyaga abo balī mu sī.

¹⁰H'ī chene a banhū bakabagalūkīlaga, baayūpandīkīla ho na minzī gatī na būmalīle.

¹¹Baakūyūhaya gīkī, “Ū Mulungu akūmana ginehe? Būlīmo witegeleja ū mulī we ūyo alī Higūlya no no no?”

¹²Managa gīkī, a babūbi hū balī gīko; bakikalaga bifuulile pyī ī shikū, alīyo hū biseema ū kūsaba.

¹³Gashi ū nene nakūnogelaga midūhū, Ītīho nguno ya kwikala na ng'holò neela, nakūjimīījaga makanza dalali kwikala nūkalaba makono gane mu būtūngīlīja.

¹⁴Nguno nakūluhaga no līīmi ji; nī dilū a makoye gakaniminyaga no.

¹⁵Ūlū ni niwīle, “Ī gete nahaye gīkī,” ni natadūgije ū kūyomba gwa ng'hana ū kū shibyalīlwe sha baana bako.

¹⁶Aho nidedeeng'hanya gīkī nayitegeleje ī yenīyī, nakalemeelwa, nūkalīla kūzwangana.

¹⁷Nose nūja ng'wipandī lyeela kūlī Mulungu, hūna nūyitegeleja ī ng'halīlo yabo.

¹⁸Gashinaga ūbatūūlile mu mapandī ga būnhyūūlūlū, ūkabashindīkaga baakagwa bayagaala.

¹⁹Bakakenaagūkaga ng'wikanza iguhī no, lyogohya līkabapyagūlaga bashila ho gete.

²⁰Ee Seeba, īlī gīt'ūmo munhū akamishaga kūfuma mu shilooti; ūkwīdalaha īyo bakwibboojaga.

²¹Ī ng'holò yane īkaminyiwa no, ū moyo gwane gūsaatwa kīngī nasho.

²²Nakabiza mbūūlī ūyo atamanile shose shose, ū kū būtongi wako nūbiza gītī nalī shiinū.

²³Alīyo nahene nalī hamò nang'ho shikū jose; hama ū bebe ūnidimile nkono gwane ū gwa būlyo.

²⁴Ū bebe ūkanitongeelaga mu kaganikīlīle kago, hanuma ya henaho ūkūnanukūla ng'wikūjo lyako.

²⁵Nani nakūnsanya ū ng'wigūlū ūlū ūtī bebe? Nīyo ū nene ūlū nalī hamò nang'ho, shitīho īsho nalashiikūmve ū mu sī.

²⁶Ū mīlī nī ng'holò yane shikūmala ū nīmo, alīyo ū Mulungu alī nguzu ja ng'holò yane, na ngabo gwane gwa shikū ja welelo bose.

²⁷Abo balī kūle nang'ho bakūyagaala, abo batī na logohano kūlī bebe ūkabakenaagūlaga.

²⁸Alīyo ū nene īlī chiza ū kwikala bbihī na Mulungu; ū kūsanya kwane nantūūlīlile Seeba MULUNGU, nakūshikumūcha ī shītīle shako shose.