Read Sukuma Bible 2015 – Bibilia Ilagano Lya Kale 2015 Zabuli 75 Bible Online

Zabuli 75 - Sukuma Bible 2015 – Bibilia Ilagano Lya Kale 2015 bible

Zabuli 75

¹Kūlwa ntongeeji wa bīmbi; ng'wilaka lya, “Ūtizūkenaagūla.” Zabuli ya ng'wa Asafu; lyīmbo. Ee Mulungu, tūlīkūlūmba, tūlīlūmba nguno ī lina lyako līlī hihī; a banhū bakwīsomboolaga ī mihayo yako ya kūkumya.

²Ū bebe ūhayile gīkī, “Nene hū nalīhelile ī likanza, ū nene hū nakalamulaga mu būtūngīlīja.

³Ī sī ūlū yūtingina na a bikaji baamo būzwangana, hū nene nakajihandatījaga ī ng'hīngī jayo.

⁴A bikumīlīja nakūbawīlaga gīkī, ‘Oyagi ū kwigīmba gīmba,’ a bakenaagūji nabo gīkī, ‘Lekagi ū kwikumīlīja gīkī mulī na nguzu.

⁵Yaya ū kwibona gīkī mulī higūlya ya bose, yaya nūūlū kūlūngalūnga ng'wigīmbagīmbaga nyadooshi.’”

⁶Nguno ū kūgūngūhiwa kwa munhū kūtīngīīlaga kīya nūūlū ng'weli, nūūlū kū matogolo.

⁷Alīyo Mulungu h'ūyo akalamulaga, akūng'wicha ha sīlīlī ūyū, ūngī ūnsunang'hīja.

⁸Ū mu nkono go ng'wa SEEBA shilīho shikombe, shokalile divai ya būpelanu bokwe, Ītūgije shisanjo sha būlī mbika; nīyo īkūfookaga ifulo dūhū. Akīkenenaga hūna bīīng'wa pye a bikaji ba mu sī a ba malofu, kūshisha kwīmala na a madika gayo.

⁹Alīyo ū nene nakūlūngalūnga makanza gose mu kūkumīlīja; ū Mulungu o ng'wa Yakobo nakūng'wīmbīla mīmbo ga kūngongoola.

¹⁰Nakūjikenaagūla pyī ī nguzu ja ba malofu, alīyo ī nguzu ja batūngīlīja jikūgūngūhiwa higūlya.