Read Sukuma Bible 2015 – Bibilia Ilagano Lya Kale 2015 Zabuli 78 Bible Online

Zabuli 78 - Sukuma Bible 2015 – Bibilia Ilagano Lya Kale 2015 bible

Zabuli 78

¹Lyīmbo lya ng'wa Asafu. Bing'we banhū bane, igwagi ū būlangi wane, Īdegelekagi ī mihayo īyo nalīhaya na nomo gwane,

²Nakūlūngalūnga sumo na nomo gwane, nakūfuboola mbisīla, mbisīla ja kūfuma kale.

³Ī mihayo īyo tūkīyigwaga na twīmanile; mihayo īyo baatūwīla babyaji bise.

⁴Ī yoi tūtūbabisa a baana babo, nī shibyalīlwe īsho shikwizaga tūkūshiwīla; ī shītwa sha ng'wa SEEBA ī sha kūkumīlījiwa nī nguzu jakwe, ī yakūkumya īyo wīyīta.

⁵Akang'winha ū Yakobo mihayo ya kūntongeela; ūng'winha malange ū Isilaeli, ayo akabalagīla bakūlūgenji bise kūbalanga a baana babo.

⁶Ī shibyalīlwe īsho shiliza shiitegeleje, pye na a baana abo bataalī kūbyalwa; nabo bakūle bakūbamanīkījaga a baana babo.

⁷Ū mu gīko hū bakūnsanya ū Mulungu, nī shītīle shakwe batūshīība, alīyo bakūshidima ī shilagīlo shakwe.

⁸Batizūlondeela shīmīle sha bakūlūgenji babo. Abo shibyalīlwe shabo shalī sha mitwe midiimu na bashitiigwa; shibyalīlwe sha ng'holò jitīmīīlile ha ng'hana, banhū ba moyo gūtansanije Mulungu.

⁹Bagosha ba Efulaimu bakafuma na būta wabo kūja kū būlūgū, alīyo ū mu lūshikū lwa kwamba būlūgū, būshoka kū numa.

¹⁰Baalī baalīleka ī lilagane lya ng'wa Mulungu, būlema nū kūshimīzīla ū mushilagīlo shakwe.

¹¹Baalī bīyība īyo walī wīyīta, Ī yakūkumya īyo walī waboolekeja.

¹²Walī wīta shakūkumya ū kū būtongi wa bakūlūgenji babo, aho balī mu sī ya Misili, ng'witogolo lya Zoani.

¹³Akagabanhya minzī ga nyanza ūbabītīja henaho, a minzī ūgīta gikīga gītī shigūlū.

¹⁴Ī līīmi wabatongeelaga w'ilunde, Ī būjikū wabatongeelaga na būūpe wa moto.

¹⁵Ū ng'wibbaala akatandūla shiganga, ūbinha minzī mingī gītī ga kūfuma mu nyanza.

¹⁶Milala ya shiganga wīyīta kūbiza nzīla ja minzī, minzī ūgīta gahūūme gītī galī mu mongo.

¹⁷Nahene hū bakongeja ū kūng'wītīla ī shibi, ū ng'witogolo bakangomela ūyo Alī Higūlya no.

¹⁸Ū mu ng'holò jabo būngema ū Mulungu, bigongela shilīwa īsho baalī baashikūmvwa.

¹⁹Būyūndugumīla ū Mulungu; būhaya, “Ū Mulungu adūgije kūtūtengela shiliwa ū ng'wibbaala ūmu?

²⁰Na ng'hana walī watūlile shiganga, gilonga minzī mingī, yūloloma myongo. A banhū bakwe adūgije kūbinha nī shilīwa, pyī nī nyama?”

²¹Ū SEEBA aho wabiigwa ūpelana no, moto gwakwe gūūbaka kūlwa ng'wa Yakobo, ū būpelanu wakwe būbapembekela a Baisilaeli;

²²nguno bakalema ū kūnsanya ū Mulungu, nūūlū kūjisanya ī nguzu ja būpīji wakwe.

²³Alīyo nahene akagalagīla a malunde, ūjilugūla ī nzwigī ja ng'wigūlū.

²⁴Ūbenhela mbula ya eemanu, ūbinha shilīwa sha kūfuma ng'wigūlū.

²⁵Banhū būlya shilīwa sha ba malaika, akabinha shilīwa būlya gīt'ūmo batogelilwe.

²⁶Hanuma ūhembya nyaga gwa kīya kūfuma kwigūlū, na nyaga gwa dakama ūgwenha kūlwa būdūla wakwe.

²⁷Akabenhela nyama gītī mbula, ningī no gītī lūbuubu; noni ja kūlala ningī gītī maseni ga ha nyanza.

²⁸Ūjenha ū mu ng'hambī yabo, jūgwa hasī kūgapīndīlīja a maheema gabo.

²⁹Bakalya bigeja kūshisha būūdūdūlūka, nguno akabinha gīt'ūmo jalī ng'hūmbū jabo.

³⁰Alīyo aho bataalī kwīnga a ha shilīwa īsho baalī bashihahaalīlile, ī shilīwa aho shitaalī mu milomo yabo,

³¹ū būpelanu bo ng'wa Mulungu būbikīīla; ūbabūlaga pye a ba nguzu ningī ū mubo, ūbagwisha hasī a basūmba ba mu Isilaeli.

³²Kwike nūūlū īkī īkabilongela ī yenīyo, nahene bakongeja dūhū ū kwīta ī shibi; nūūlū īkī walī waboolekeja shakūkumya, bakongeja ū kūndalaha.

³³Hūna lūūlū ī shikū jabo akajikalīcha sagala sagala gītī myūyī; ni myaka yabo bīmalīja balī mu boobà.

³⁴Ū Mulungu ūlū wababūlaga bankoobaga, bagalūkaga bandya kūnkooba mu būkomezu.

³⁵Bizūkagwa gīkī ū Mulungu alī shiganga shabo, ū Mulungu ūyo Alī Higūlya no hū nkomooji wabo.

³⁶Alīyo banaaja laajaga na milomo yabo; banembaga na ndīmi jabo dūhū.

³⁷Nguno ī ng'holò jabo jalī jitīmīīlile ha ng'hana ū kūlī we; baalī batalīdimile ī lilagane lyakwe.

³⁸Alīyo īkī ū wei alī na shigongo, wabalekejaga ī shibi shabo, waleka ū kūbamala. Ng'hangala nīngī wabūlang'hanaga ū būpelanu wakwe, walī atabūsooselaga pyī ū būpelanu wakwe.

³⁹Wizūkagwa gīkī balī banhū ba mīlī dūhū, lūyaga lūbītile, ūlo lūtīko kūshoka hangī.

⁴⁰Ū ng'witogolo bikalaga bakūngomelaga ng'hangala na ng'hangala, makanza mingī bampīnīhajaga ū kū mbaala!

⁴¹Bangemaga ng'hangala ningī no, bayūmpelanya ū Ng'wela wa Isilaeli.

⁴²Baalī batawiganikaga ū būdūla wa nkono gwakwe, nūūlū ū lūshikū ūlo akabīngīnja mu nkono gwa nuhya;

⁴³aho akoolecha shimanīkījo shakwe mu Misili, nī sha kūkamaaja shakwe ū ng'witogolo lya Zoani.

⁴⁴A minzī ga myongo yabo akagagalūcha gūbiza mininga, būlemeelwa kūgang'wa a minzī ga myongo yabo.

⁴⁵Na magi ūbatūmīla gūyūbaluma, būyaga na madanga ga kūbakoya.

⁴⁶Ī shilīwa sha mu migūnda yabo ūshigumīīla mbilīsī, na a matwajo ga mu milīmo yabo gūmalwa njige.

⁴⁷Ī mizabibu yabo wīkenaagūla na mbula ya mawe; ī mitini yabo yūkenaagūlwa mbeho ng'halī.

⁴⁸Ī ng'ombe jabo ūjileka jūtūlwa mbula ya mawe; jiyūtaalwa ng'hūba ī mitugo jabo.

⁴⁹Ūbitīīla būpelanu wakwe būkalī; bidīkīlwa būdaki, wayī na makoye, ūbatūmīla ibità lya bamalaika kūbayagaja.

⁵⁰Ū būpelanu wakwe ūbūlugūlīla nzīla; atawihūgije ū būpanga wabo ū kwicha, alīyo akabagumanīja kwihūūya.

⁵¹Akababūlaga pye a babyalwa ba kwandya ū mu Misri, abo baalī nguzu jabo ū mu maheema ga ng'wa Hamu.

⁵²Alīyo a banhū bakwe ūbafunya moi gīt'idaale; ūbīta nabo mu matogolo, akūbatongeelaga gītī ng'holo.

⁵³Batogohile shose shose īkī wabatongeelaga mu mhola, alīyo a banishi babo yūbamila ī nyanza.

⁵⁴A banhū bakwe ūbashisha kū mbīmbī ja sī yakwe neela, kū lūgūlū ūlo walī walūdima na nkono gwakwe gwa būlyo.

⁵⁵Ūpeeja mahanga gīkī gabīngīle a boi, Ī sī ya mahanga wīfunya kūbiza wingīji wabo; ū mu kaya jenījo ūtūūla Baisilaeli, ng'anda jabo jikala mo.

⁵⁶Kwike nahene bakangema, ū Mulungu ūyo Alī Higūlya no būngomela, ū būkaanīji wakwe būleka ū kūbūdīlīla.

⁵⁷Bakagalūka būneka, boya ū kūnsanya; h'ūmo bīītīlaga na a bakūlūgenji babo, būbiza batigeleelilwe kūsanyiwa, ūmo būkabizīlaga būta ūlū būbīnzīkile.

⁵⁸Yūbatoga myalīlo kū mapandī ga kwigūlya, būmpelanya mu wilamīlīja wenūbo; būng'wingīja mu wilu kūlwa shiikolile shabo sha kūpūnza.

⁵⁹Ū Mulungu akagwigwa ū gwenūyū ūdaka no, ūnema nye gete ū Isilaeli.

⁶⁰Ūbūlekanīja ū wikalo wakwe ū mu Shilo, Ī liheema, īlo wikalaga mo hamò na banhū.

⁶¹Ī nguzu jakwe[17] ūjileka jūtwalwa būding'wa, Ī likūjo lyakwe lyūja mu makono ga banishi.

⁶²A banhū bakwe ūbaponya kū līlūshū lībamale, bakampelanya no a banhū ba wingīji bokwe.

⁶³Moto gūbabuugīlīja a baana babo a basūmba; a banhya gūūlema ū gwa kūbinīlwa mbina ya kabunga.[18]

⁶⁴A bagabīji babo būbūlagwa bo līlūshū mu būlūgū, a bachīlwa babo batapandīkile ū ng'wanya gwa kūbalīla.

⁶⁵Hūna ū Seeba nose ūmisha gītī kūfuma mu tūlo; ūchoma ng'wano gītī ngosha wa makaya akolilwe walwa.

⁶⁶Ūbatūla a banishi bakwe ūbapyena, būgwa mu magooke ga welelo bose.

⁶⁷Kwike akīlema ī ng'hambī ya lūganda lwa ng'wa Yosefu, nū lūganda lwa Efulaimu atalūsolile.

⁶⁸Alīyo ūlūsola lūganda lwa Yuda; lūgūlū lwa Sayuni, ūlo akalūtogwa.

⁶⁹Ūzenga ipandī lyakwe lyeela gītī ngūlū ndīhu; gītī sī īyo ayītūūlile ho gīkī ībize ya kūshinga ilalī shikū jose.

⁷⁰Ūnsola ntūmami wakwe Daūdi, ūng'winja kū madīīmīlo ga ng'holo.

⁷¹Ūnecha nīmo gwa kūlang'hana ng'holo na baana bajo, ūng'wīta kūbiza ndīīmi wa banhū bakwe, wa babyalwa ba ng'wa Yakobo, Isilaeli ūyo alī wingīji wakwe.

⁷²Ū Daūdi ūbalang'hana na ng'holò ngololoku, ūbatongeela na nkono gwa witegeleja būtaale.