Read Sukuma Bible 2015 – Bibilia Ilagano Lya Kale 2015 Zabuli 79 Bible Online

Zabuli 79 - Sukuma Bible 2015 – Bibilia Ilagano Lya Kale 2015 bible

Zabuli 79

¹Zabuli ya ng'wa Asafu. Ee Mulungu, a mahanga ga banhū gaabūūbūkīlile ū wingīji wako, gīsosohagije ī hekalu yako, ī Yelusalemu gīkenaagūlile, Ī haha mapagale gike mo.

²Ī mibimba ya batūmami bako bīyinhile noni ja hape jilye, ī mibīlī ya beela bako bīponije Īliwe mashinū ga mu sī.

³A mininga gabo baagiitile sagala gītī minzī hose pyī ū mu Yelūsalemu, na atīho ū wa kūbajīka.

⁴Ū kū mahanga ayo tūzenganilwe nago tūlī badalahwa no ī haha, ū kū banhū abo batūpīndije tūlī ba kūgīmvwa nyachilū na kwineenelegejiwa.

⁵Ee SEEBA, kūshisha nanalī? Ūkwikala ūpelanile shikū jose? Ū wilu wako būkūbaka gītī moto ilalī?

⁶Ū būdaki wako gītīīlage a mahanga ga banhū abo batatogilwe kūkwitegeleja; a mabūsugi ayo gatalīhayaga ī lina lyako.

⁷Nguno bandakunile ū Yakobo, Ī sī yakwe bīkenaagūlile.

⁸Yaya ū kūtūbalīla ū būsobya wa bakūlūgenji bise ūbo ūkūwizūkagwa, ī shigongo shako ni shitūsūng'wanhage wangū; nguno twiboneelilwe no.

⁹Ee Mulungu wa būpīji wise, tūgunage kūlwa nguno y'ikūjo lya lina lyako; tūpījage, ūtūlekeje nī shibi shise kūlwa lina lyako.

¹⁰Nibūlī a mahanga gikale gūhaya gīkī, “Ū Mulungu wabo alīhalī?” Goolekejage a mahanga mu būtongi wise, gamane gīkī ūlī maji wa shiilī kūlwa mininga ga batūmami bako ayo gitwa.

¹¹Ū kūgang'hīla kwa batungwa ni kūkūpandīkage; abo balī mu nsango gwa kūbūlagwa ūbalang'hane na nguzu ja nkono gwako.

¹²Ee Seeba, a bazenganwa bise balīpīlage; ū būdalahīja ūbo bakūkūdalahaga bebe, ni būbigasījage ng'hangala mpungatī.

¹³Hūna a banhū bako tūkūkūlūmba shikū jose, bise abo tūlī ng'holo ja ng'widīīmīlo lyako; ī likūjo lyako tūkūlīkumūcha, kūfuma shibyalīlwe kūshisha shibyalīlwe.