Read Sukuma Bible 2015 – Bibilia Ilagano Lya Kale 2015 Zabuli 81 Bible Online

Zabuli 81 - Sukuma Bible 2015 – Bibilia Ilagano Lya Kale 2015 bible

Zabuli 81

¹Kūlwa ntongeeji wa bīmbi; ng'wilaka lya, “Gitisi.” Zabuli ya ng'wa Asafu. Ng'wīmbīlagi n'ilaka ū Mulungu wa nguzu jise; Hamukagi, munyegele ū Mulungu o ng'wa Yakobo.

²Hoolanījagi mukūng'wīmbīlaga, kūnū ng'ūtūla na ng'oma, na malaka gawiza ga ndono na malimba.

³Ng'ang'aajagi mhembe mu mfumano gwa ng'weji; nū ng'wikanza lya ng'weji gwisekile, ū mu lūshikū lwa shigukulu shise.

⁴Nguno ī shene shilī shilagīlo kūlī Isilaeli, kahelele ka ng'wa Mulungu o ng'wa Yakobo.

⁵Shilagīlo īsho akantūūlīla Yosefu, aho akajīdumīla sī ya Misili; ūko nakiigwa ilaka īlo naalī natalīmanile;

⁶Lyahayaga, “Nang'wīngīgije ū nigo ū kwibega lyakwe; nū nigo gwa shigabbu nūng'wīngīja ū mu makono gakwe.

⁷Aho walī mu makoye ūkanitana, nūkūpīja, nakakūshokeja mu kūpalalūka kwa lūkūba, nūkūgema ū kū minzī ga Meliba.

⁸Bing'we banhū bane degelekagi namuganikīle, bebe Isaeli, gīt'ūlū ni wanidegeleka!

⁹Yaya ū kūbiza na mulungu ngeni ū mulī bebe, ūtizūgema kūtuja mazwi gako kūlī mulungu ngeni.

¹⁰Ū nene nalī SEEBA Mulungu wako, ūyo akakwīnja mu sī ya Misili; asamaga no no no ū nomo gwako, nane nakūgokaja.

¹¹Alīyo a banhū bane batalīdegelekile Ī lilaka lyane, A Baisilaeli batanidīlīlile.

¹²Hūna lūūlū nūbagumanīja, bikale mu ng'holò jabo ngang'hanazu; bīīte īyo batogilwe kwīta boi benekīlī.

¹³Gīt'ūlū ni banidegeleka a banhū bane; ū Isilaeli ūlū ni wazunya kūshimīzīla ū mu nzīla jane,

¹⁴a banishi babo ni nabaheeba wangū no, nīyo ū nkono gwane ni nagūgalūcha gwilwishe nabo a banishi babo.

¹⁵Abo bankolilwe ū SEEBA ni baagwa mu magūlū gakwe kūnīlīīla, ū nsango gwabo ni gwabiza gwa būja na būja.

¹⁶Alīyo a bing'we ni namulisha ngano yawiza, nīyo ni nang'wigūtya na būūkī wa mu shiganga.”