Read Sukuma Bible 2015 – Bibilia Ilagano Lya Kale 2015 Zabuli 86 Bible Online

Zabuli 86 - Sukuma Bible 2015 – Bibilia Ilagano Lya Kale 2015 bible

Zabuli 86

¹Kūlomba kwa ng'wa Daūdi. Ee SEEBA, nidegelekage ūnishokeje, nguno ū nene nalī ng'habī na ngayiwa.

²Būlang'hanage ū būpanga wane, nguno nakūkūgije; ū bebe ūlī Mulungu wane, mpījage ū ntūmami wako ūyo akūsanije.

³Nichīlage shigongo, Ee Seeba, nguno nakūkūlīlīīlaga līīmi bbu.

⁴Būyejage ū būpanga wa ntūmami wako, nguno ū būpanga wane nalībūtūūla kūlī bebe, Ee Seeba.

⁵Ee Seeba, ūlī wa shigongo na nekeja; ūlī na būtogwa būtaale kū bose abo bakūkūlīlīīla.

⁶Ee SEEBA, kūdegelekage ū kūlomba kwane, kwigwage ū kwikūmbīlīja kwane.

⁷Mu lūshikū lwa kūluhiwa kwane nakūkūlīlīīla, nguno ū bebe ūkanishokejaga ū kūlomba kwane.

⁸Ū mu bamulungu bose atīho wa kūlenganījiwa na bebe, Ee Seeba; nūūlū shitīho shītīle sha kūlenganīla na shako.

⁹Ee Seeba, pye a mahanga wagabeeja bebe; gakwiza gakūtugīje mazwi. Gakūlīkumīlīja ī lina lyako.

¹⁰Nguno ū bebe ūlī ntaale, na ūkīītaga mihayo ya kūkamaaja; bebe wike hū ūlī Mulungu.

¹¹Ee SEEBA, nilangage ī nzīla yako, nane nakūdūla kūshimīzīla ū mu ng'hana yako. Tūūlaga gwīnda ū mu ng'holò yane, nakūbiza na logohano ū kū lina lyako.

¹²Ee Seeba Mulungu wane, nakūkūkumīlīja na ng'holò yane yose; hangī nakūlīkūja ī lina lyako shikū jose.

¹³Nguno ū būtogwa wako būlī būtaale no ū kūlī nene, wabūpīgije ū būpanga wane kūfuma mu kūlimu.

¹⁴Ee Mulungu, banhū bibonya baanūbūkīlile, ibità lya biboneeji līkūkoobaga kūnibūlaga, banhū abo batakūdīlīlile.

¹⁵Alīyo ū bebe, Ee Seeba, ūlī Mulungu nsaatwa wa banhū, hangī wa shigongo, na ndīzu kūpelana, hama ookalile būtogwa, na ūlī nsanyiwa no.

¹⁶Nigalūkīlage, ūnoolekeje ī shisa shako, ng'winhage nguzu jako ū ntūmami wako; mpījage ū ng'wana wa ntūmami wako nkīma.

¹⁷Ee Seeba, nīītīlage mhayo gwa koolecha wiza wako, abo banikolilwe babone, bagooke; nguno ūlīnigunanha, kūlwa kūnilūngūja.