Read Sukuma Bible 2015 – Bibilia Ilagano Lya Kale 2015 Zabuli 88 Bible Online

Zabuli 88 - Sukuma Bible 2015 – Bibilia Ilagano Lya Kale 2015 bible

Zabuli 88

¹Lyīmbo lya ng'wa Heemani muna Ezila. Zabuli ya bitūnja ba ng'wa Koola; kūlwa ntongeeji wa bīmbi. Ng'wilaka lya, “Mahalasi.”. Ee SEEBA, Mulungu wa būpīji wane, būlī lūshīkū līīmi na būjikū nakūkūlīlīīlaga.

²Ū kūlomba kwane ni kūkūpandīkage, tegaga ū gūtū gwako ūkwigwe ū kūlīla kwane.

³Nguno nalī na makoye mingī ū mu būpanga wane, nū būlamu wane būlī bbihī na kūcha.

⁴Nakwisaabīlagwa mu banhū abo bajile ng'wichongo, nalī munhū ūyo atī na nguzu nūūlū hado.

⁵Nalekanījiwe nguno natikīlile na bafu, nalī gītī bafu abo balaalile mu shigila; abo ūtī na nguno ya kūbizūkwa, Īkī batīmo ū mu nkono gwako.

⁶Ū nene ī haha ūniponije ng'wichongo ishimu lya bashimu; kū giiti shitaale kūlwa būshimu walyo.

⁷Ū būpelanu wako būniikalīlile, A mahuli gako galīniminya no.

⁸Wanilekanije na a bimane bane, Ī haha nalī līshikolo ly'igekemaja ū kūbo; nalugalīlilwe, natūdūla kūpūlūgūka.

⁹Nose a miso gane gītile wija kūlwa būpīna; Ee SEEBA, būlī lūshikū nakūkūlīlīīlaga nakwambīlile makono.

¹⁰Ūkoolekejaga shakūkumya ū kū bafu? Abo bachile bashikile kūbūūka bakūkumīlīje?

¹¹Ū būtogwa wako būkūlomeelwa ū mu shigila? Nūūlū ū būsanyiwa wako būkūlomeelwa kū wikalo wa bafu?

¹²Ī shakūkumya shako shimanīkile ū mu mapandī ga giiti? Nūūlū ū būtūngīlīja wako ū kwipandī lya babo baamala kwīwa?

¹³Alīyo, Ee SEEBA, nalīkūlīlīīla ūnigune; būlī dilū nakūkwenhela ū kūlomba kwane,

¹⁴Ee SEEBA, nibūlī ūkūnilemaga? Nguno kī ūkūnibisaga ū būshū wako?

¹⁵Kūfuma ha walūki bone nakūluhaga, naabīta na kwegeela kūcha; a makoye ga kwīngīīla kūlī bebe nago nagabītīla ga būyaga; nose ī haha naaseedeekaga.

¹⁶Ū būpelanu wako waniihoolekelile, Ī lyogohya lyako lyanikenaagūlile.

¹⁷Pyī ī yenīyī īkwikalaga īnipīndije būlī lūshikū gītī ihūūma, yanimilile gete.

¹⁸Wanilekanije nabo a bimane bane, Ī giiti hū nwani ng'wichane wa bbihī ī haha.