Read Sukuma Bible 2015 – Bibilia Ilagano Lya Kale 2015 Zabuli 89 Bible Online

Zabuli 89 - Sukuma Bible 2015 – Bibilia Ilagano Lya Kale 2015 bible

Zabuli 89

¹Lyīmbo lya ng'wa Esani muna Ezila. Ee SEEBA, nakwīmba kūlwa būtogwa wako shikū jose, ū būsanyiwa wako nakūbūkumūcha na nomo gwane kū shibyalīlwe shose.

²Nakūhaya hape ūmo īlī; gīkī ū būtogwa wako būtī wa kūtinginyiwa, ū būsanyiwa wako wīmīīlile kūlwa nguzu ja ng'wigūlū.

³Ū bebe ūhayile gīkī, “Naabegije būlagane na nsolwa wane; naang'wilahīlīlile ū Daūdi ntūmami wane,

⁴‘Ū būbyīle wako nakūwīta būshinge ho shikū jose, nī lisumbī lyako lya būtemi nakūlyīta lībize na nguzu mu shibyalīlwe shose.’”

⁵Ee SEEBA, ī shītīle shako sha kūkumya shikūkumīlījiagwa ū mu mapandī ga ng'wigūlū; nū būsanyiwa wako ū mu kwibilinga kwa beela.

⁶Nguno alīko nani ū kwigūlū, ūyo ashikile kūlenganījiwa na SEEBA? Ū mu bose a ba ng'wigūlū, nani ū wa kūgelanījiwa na SEEBA?

⁷Ū ng'wibanza lya beela bose ū Mulungu ogohilwe no; nīyo alī na lyogohya itaale, kūbatinda pye abo bampīndije.

⁸Ee SEEBA wa mabità, nani ūyo abizile gītī bebe? Būdūla na būsanyiwa wako, Ee SEEBA, shikūpīndije hose hose!

⁹Hū bebe wīsugile nī nyanza, pye na a kasalingūkīle kaayo; a mahuuli gayo gakalubangūkaga wagalembeeja.

¹⁰Ū bebe h'ūyo ūkalīpondagūla Līlahabu, lyūyagaala; a banishi bako ūbabbalasanya na nkono gwako gwa nguzu.

¹¹A mapandī g'igūlū galī gako, nī sī nayo yako; ī sī nī shose īsho shilīmo shīlī shako, bebe h'ūyo washiseema.

¹²Ī sukuma wībeeja bebe, nī dakama; Ī Taboli nī Helimoni, ī lina lyako shikalīkumīlījaga mu būyegi.

¹³Ūlī na nkono gwa būdūla; ū nkono gwako gūlī gwa nguzu, ū nkono gwako gwa būlyo gūlī higūlya no.

¹⁴Būtūngīlīja na kalamulīle ka ng'hana hū shilī nsingi gw'isumbī lyako lya būtemi. Ū būtogwa nū būsanyiwa, ū bebe ūshitūūlile kū būtongi.

¹⁵Ee SEEBA, balī na abo balitegelegije Ī lilaka lya būyegi; abo bakashimīzīlaga ng'wisana lyako,

¹⁶na kūlocha bakūyegelaga mu lina lyako, na kūsangabala kūlwa būtūngīlīja wako.

¹⁷Nguno ū bebe ūl'ikūjo lya nguzu jabo; na kūlwa wiza wako ī lipembe[22] lise līkūgūngūhiagwa.

¹⁸Na ng'hana ū SEEBA alī lūmūda lwise; nīyo ū Ng'wela wa Isilaeli hū Ntemi wise.

¹⁹Abo bakūsanije wabawīla kale, ūkahaya mu koolekegeje kako, “Munhū wa būdūla nang'winhile nguzu; ūyo asolilwe kūfuma mu banhū nangūngūhije.

²⁰Ntūmami wane Daūdi nampandīkile, nūng'witīīla maguta gane meela.

²¹Ū nkono gwane gūkwikala hamò nang'hwe, alichene; gūkūnguzuhya ū nkono gwane.

²²Ng'wanishi atīko kūntobisha goodi bo hadī; nūūlū atīho ng'hūnga wa kūng'wiboneela.

²³A banishi bakwe nakūbayagaja abalolile, abo bankolilwe nakūbataalīka hasī.

²⁴Būsanyiwa na būtogwa wane shikūbiza hamò nang'hwe, mu lina lyane ī lipembe lyakwe līkūgūngūhiwa.

²⁵Ū nkono gwakwe nakūgūlogeja kū nyanza, ū nkono gwakwe gwa būlyo higūlya ya myongo.

²⁶Akūnilīlīīla alīhaya, ‘Ū bebe ūlī Baba, Mulungu wane, na Shiganga sha būpīji wane.’

²⁷Hama nakūng'wīta abize myalwa wane wa kwandya, ngūngūhiwa kūtinda batemi ba mu sī jose.

²⁸Ū būtogwa wane ū kūlī we nakūbūlang'hana wikale ho shikū jose, nī lilagane lyane īlo nalaganile nang'hwe līkūbiza na nguzu.

²⁹Ū būbyīle wakwe nakūwīta būshinge ho welelo na welelo; nīyo aho lītaalī līlīho ī ligūlū, nī lisumbī lyakwe lya būtemi līkwikala līlīho.

³⁰A baana bakwe ūlū bīnga ū mu malange gane, boya kūshimīzīla ū mu katongeelele kane,

³¹ūlū būyīkenaangūla īyo īlī mu kahelele kane, būleka ū kūshidima ī shilagīlo shane,

³²ū būhūbi wabo nakūbūhama bo nang'ha, nakūtūmamīla manasu ūlū būkenaagūla.

³³Kwike natīko ū kūng'wīngīja ū būtogwa wane, nūūlū ū būsanyiwa wane natīko kūbūleka būche mpandagīlo.

³⁴Natīko kūlīkenaagūla ī lilagane lyane, nūūlū natīko kūgalūcha mhayo ūyo gūfumile mu nomo gwane.

³⁵Naalahīla kamò ilalī mu wela wane, natūnemba ū Daūdi.

³⁶Ū būbyīle wakwe būlī wa kūshinga ho shikū jose, nī lisumbī lyakwe lya būtemi līkūshinga ho ū kū būtongi wane gītī līīmi.

³⁷Līkwikala ho shikū jose gītī ng'weji, gītī nkaanīji wa kūsanyiwa ūyo alī kwigūlū.”

³⁸Alīyo ū bebe wadalahile ūponya, wampelanīlile ū ng'witīīlwa maguta wako.

³⁹Walīlekile ī lilagane īlo walagana nang'hwe ū ntūmami wako; ī ngikili yakwe wīgalagagije hasī mu lūbuubu yūsosohala.

⁴⁰Wajikambūlile pyī ī ndugu jakwe, nī ng'hambī jakwe ja kūpīlīla ūjisambaagūla jūbiza mapagale gike.

⁴¹Pye a babīti bakwīnjaga īsho batogilwe, ū kū bazenganwa bakwe ī haha alī ndalahwa no.

⁴²Ū nkono gwa būlyo gwa banishi bakwe wagūguzuhije, pye a banishi bakwe wabinhile sha kūbayeja.

⁴³Ū lūshū lwakwe walūsaligūlile, ū būūgī būshoka kū numa; nū mu būlūgū ooyile ū kūngunanha.

⁴⁴Ī likūjo lyakwe wang'wīngīgije, nī lisumbī lyakwe lya būtemi walīponije hasī.

⁴⁵Wangehegije ī shikū ja būdinha bokwe, ūnkundīkīja igisha minala.

⁴⁶Ee SEEBA, kūshisha nanalī? Ūkwikala wibisile kūshisha nanalī? Ū būdaki wako būkūbaka gītī moto kūshisha nanalī?

⁴⁷Wizūkagwe ū būguhī w'ikanza lya būlamu wane, nguno pye a banhū wababūmba batī na gwa kūpya.

⁴⁸Alīho munhū kī ū mpanga ūyo atūbona icha? Nani ūyo adūgije kwipīja atizingīla mu kūlimu?

⁴⁹Ee Seeba, būlīhe ū būtogwa wako ū wa kale na kale, ūbo ūkanahīlīla Daūdi mu būsanyiwa wako?

⁵⁰Ee Seeba, izūkagwa ūmo akūsondagūlīlagwa ū ntūmami wako, nū mumo nabūūkīgije mu ng'holò yane mashidūki ga banhū bose.

⁵¹A mashidūki ayo bakūgatūmamīlaga banishi bako Ee SEEBA; ayo bakūgatūmamīlaga kūnsondagūla ng'witīīlwa maguta wako būlī kwene ūko alībītīla.

⁵²Ū SEEBA akumīlījiwe welelo bose! Ee, Alichene.