Read Sukuma Bible 2015 – Bibilia Ilagano Lya Kale 2015 Zabuli 9 Bible Online

Zabuli 9 - Sukuma Bible 2015 – Bibilia Ilagano Lya Kale 2015 bible

Zabuli 9

¹Kūlwa ntongeeji wa bīmbi; ng'wilaka lya Lūfu lwa ng'witūnja. Zabuli ya ng'wa Daūdi. Ee SEEBA, nakūkūkumīlīja na ng'holò yane yose; nakwīkumūcha pyī ī milīmo yako ya kūkumya.

²Nakūyega na kūsangabala mulī bebe; Ee, Bebe Ūyo Ūlī Higūlya no, ī lina lyako nakūlīkumīlīja mu nzīla ya mīmbo.

³A banishi bane bakagalūkaga kūpeela, bakipamaga bayagaala kū būtongi wako.

⁴Nguno ī ng'hana nū būtūngīlīja wane, ūshilang'hanile bebe; wigashije h'isumbī lyako lya būtemi ūkūlamulaga mu būtūngīlīja.

⁵A mahanga wagahamile bebe, na a bakenaagūji ūbayagaja; ī lina lyabo walīpyagūlile ū mu sī, na batīko kwilonga hangī ilalī.

⁶A banishi baagwīlilwe mhayo gwa kūbakenaagūla ilalī; ī mizengo yabo wīkambagūlile yūshila ho gete, shitīho sha kwenheleja kūbizūkwa nūūlū hado.

⁷Alīyo ū SEEBA ng'wene Nsugi wa būja na būja, Ī lisumbī lyakwe lya būtemi alītūūlile ho kūlwa kūfunya būlamuji.

⁸Ī sī akwīlamulaga mu būtūngīlīja, a banhū abasugile mu būdeeba.

⁹Ū SEEBA al'ipeelelo lya ng'wiboneelwa, ibūngīlò ng'wikanza lya makoye.

¹⁰Abo balīmanile ī lina lyako bakūkūsanya, nguno ū bebe SEEBA ūtīko kūnekanīja ūyo akūkūkoobaga.

¹¹Ng'wīmbīlagi ū SEEBA ūyo alī mu Sayuni h'isumbī lyakwe lya būtemi, bakumūkījagi a banhū ī shītīle shakwe.

¹²Ū maji wa shiilī kūlwa būbūlagi atībaga, atīko kūbalekanīja abo bakūlījiagwa makoye.

¹³Ee SEEBA, nichīlage shigongo, bonaga ūmo balīniluhīja abo banikolilwe! Ū bebe īkī h'ūlī mūūcha wane, ūkūnīnja a ha mita gwa kūja mu kūcha.

¹⁴Ningīle mu mita gwa Sayuni nakūlyoolechaga ī likūjo lyako, nū būkomooji wako nakūbūyegelaga.

¹⁵A banhū ba mahanga baahombokelile ng'wichongo īlo bakalīsīmba boi; ū lūbeto ūlo bakalūbisa lwabapugije mu magūlū gabo boi benekīlī.

¹⁶Ū SEEBA amanīīkile; a kalamulīle kakwe akatūūlile mu būtūngīlīja, a babūbi bakigwashaga mu nzīla ya milīmo ya makono gabo benekīlī.

¹⁷A ba malofu bajile mu kūlimu, nīyo pye a banhū ba mahanga ayo gang'wībile ū Mulungu.

¹⁸Alīyo a baluhi batīko kwīwa shikū jose, nū kwisagīlwa kwa bahabī kūtūjimīīla ilalī.

¹⁹Būūkaga, Ee SEEBA, ū munhū atizūbiza na būtindi; a mahanga galamulwe kū būtongi wako.

²⁰Ee SEEBA, a banhū ba mahanga gose batūlage na lyogohya lyako, bamane gīkī a boi balī banhū dūhū.