Read Sukuma Bible 2015 – Bibilia Ilagano Lya Kale 2015 Zabuli 91 Bible Online

Zabuli 91 - Sukuma Bible 2015 – Bibilia Ilagano Lya Kale 2015 bible

Zabuli 91

¹Ūyakwikala ng'wibūngīlò lyakwe ūyo Alī Higūlya no, akwifuula mu mbeho ya Ndūji wa shose.

²Nakūng'haya ū SEEBA gīkī, “Ūl'ibūngīlò lyane n'ipīlīlo lyane, Mulungu wane ūyo nansanije.”

³Ng'hana akūkūpīja wei ū mu ntego gwa ng'hwīmi, na kūfuma ng'wihūūya lya kūyagaja.

⁴Akūkūfīkīja na nzooya jakwe, ū mu manana gakwe ūkūpandīka ibūngīlò; ū būsanyiwa wakwe būkūbiza lūmūda na būlang'hani wako.

⁵Mhayo gwabūbi gose gose gūtūkogohya makanza ga būjikū, pyī nūūlū isonga lya kūlaswa makanza ga līīmi,

⁶nūūlū ihūūya lyakwiza boosele sele mu giiti, nūūlū būkenaagūji ūbo būkizaga būkūyagajaga makanza ga līīmi.

⁷Banhū shihūmbī bashikile kūgwa hihī nang'ho, nūūlū shihūmbī ikūmi kū būlyo wako; alīyo ū bebe ītūkwegeela ī yenīyo.

⁸Ū bebe ūkwīyilolekeja na miso gako dūhū, nū nsango gwa banhū babūbi ūkūgūbona.

⁹Īkī ūng'wanukūlile ū SEEBA abize ibūngīlò lyako, ūyo Alī Higūlya no ūzunije abize wikalo wako,

¹⁰būtīho būbi ūbo būkūkūpandīka, nūūlū gūtūkwegeela mhayo gose gose gwa kūkenaagūla ng'hambī yako.

¹¹Nguno akūlagīla bamalaika bakwe kūlwako, bakūkūlang'hana ū mu nzīla jako jose.

¹²Bakūkūbūūcha mu makono gabo, ūtizipama lūpambala lwako h'iwe.

¹³Nūūlū shimba na nzoka ūkūjipanda, shimba na ng'hoboko ūkūjipanda na magūlū gako.

¹⁴Ū SEEBA alīhaya, “Īkī anitogilwe, nū nene nakūmpīja; nīyo īkī alīmanile ī lina lyane, nakūnang'hana.

¹⁵Ūlū ūnitana nakūng'widīka, nūūlū mu makoye nakūbiza hamò nang'hwe; nakūmpīja, hama nakūnkūja.

¹⁶Nakūnong'ha būlamu bo shikū ningī, nang'olekeje nū būpīji wane.”