Read Sukuma Bible 2015 – Bibilia Ilagano Lya Kale 2015 Zabuli 92 Bible Online

Zabuli 92 - Sukuma Bible 2015 – Bibilia Ilagano Lya Kale 2015 bible

Zabuli 92

¹Zabuli. Lyīmbo lya ha Sabato. Gūlī mhayo gwawiza ū kūnūmba ū SEEBA, Ee bebe ūyo ūlī Higūlya no, kūlīgongoola lina lyako.

²Chiza no ū kūshikumūcha ī shigongo shako ī dilū, nū būsanyiwa wako a makanza ga būjikū;

³kūnū jikūtūlagwa malimba, na ndono jikūkeyembaga.

⁴Nguno Ee SEEBA, ūkaniyejaga no kūlwa shītīle shako, nakwīmba na būyegi kūlwa milīmo ya makono gako.

⁵Ee SEEBA, ī shītwa shako shilī shitaale no, na a maganiko gako galī mashimu no!

⁶Ū munhū mbūūlī atūdūla ū kūmana, a bachilūchilū batīko ū kwitegeleja,

⁷Ī gīkī a bakenaagūji nūūlū bakafuluma gītī ngobi, pye a babūbi būbiza na nguzu ningī, ī ng'halīlo yabo īlī kūyagaala dūhū welelo bose.

⁸Alīyo ū bebe Ee SEEBA, ūlī ngūngūhiwa wa welelo na welelo.

⁹Ee SEEBA, gūlī gwa ng'hana, ng'hana a banishi bako bakūyagaala; pye a bīīti ba mihayo yabūbi bakūsalang'hana.

¹⁰Alīyo ī lipembe lyane walīguzuhije gītī lya mbogo, wanitīīlile maguta masūhya.

¹¹A miso gane gaabūbonile ū būpyenwa wa banishi bane, na a matū gane gaawigwile ū būkenaagūlwa wa ba malofu a biboneeji bane.

¹²A batūngīlīja bakūhola gītī ntī gwa nhende, bakūhangama gītī nkoola gwa Lebanoni.

¹³Nīyo īkī bahambilwe mu numba ya ng'wa SEEBA, bakūhangama ū mu gwalugwa ja ng'wa Mulungu wise.

¹⁴Bakūyūtwaja matwajo nūūlū kū būnamhala wabo; bakūbiza mitī īfulile minzī, ya madūūtū manīlīzu gwa.

¹⁵Ba nīmo gwa kūkumūcha gīkī, “Ī nzīla ja ng'wa SEEBA ngololoku; ū we alī Shiganga shane, būtīmo būbi bose bose ū mulī we.”